Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Den.xxvi.sten dach in Octobre]

Van die triumphelijcke feeste vanden gulden Vliese oft Toyson dor, hoe dat dat ghehouden werdt te Bruessel, met groten state ende waerdicheyt, na die oude ghewoonten.

INt iaer ons heren.M.v^c.ende xvi.so heeft die muegende prinche Karel willen achteruolghen die manieren ende feeste vanden weerden gulden Vliese, daer die meeste heren der kerstenheyt mede verchiert sijn. So heift dye Prinche die ordonnancie daer af ghehouden ghelijc hertoghe Phelips van Bourgoengien dede, die dat eerst insettede ende ordonneirde, ende als Hertoghe Karel sijn sone saligher memorien heift ghecontinueert, ende alsoo Maximiliaen namaels keyser dat achteruolcht heift, ende die Prinche Phelips coninck van Castilien byder gracien Gods, ende Leon ende Granaden dat ooc heift onderhouden. Laet ons nu voor hem bidden, want men noeyt minlijcker prinche en vant, makende alomme paeys ende vrede tusschen den heeren. Aldus hadde ooc dese moghende prinche Karel voorscreuen dese feeste van dat gulden Vlies begonst ende vp ghestelt te houden.den.xxvi.sten dach in Octobre, int Iaer voorseyde, in dye stadt van Bruessel, ende heift die oude ghewoonten gheuolcht vanden gulden Vliese drie daghen lanc inder kercken, rijdende met groten state, elcken dach met verscheyden cleederen

[fol. ij.v]

Ten eersten dach ter vespertijt reet coninck Karel met groten state van gheestelicke personen, als abten prelaten ende anderen. Ende daer nae quamen die heeren vander oorden elc naer sijn outheyt, als die graue van Nassouwen, die graue van Huerne, dye heere van Reux, heer Ian van Emanuel, die here van Lalayn, heer Hughe van Meluyn, heer Phelips dammyrael, die heere van Chieure, die Prinche van Symay, die here van Berghen, ende naer dyen quam coninc Karel, die al reden in rooden mantels ghecleet van root fluweel cramosijn, ende rontomme gheboort met costelijcken boorden ghemaect met peerlen ende costelijcke ghesteenten met rooden rolcapruynen opt hooft, ende die dat Toyson dor drouch was ooc so ghecleet. Ende achter den coninck quamen dye Palsgraue, die Marcgraue van Brandenborch, die Marcgraue van Baden, die graue van Mansuelt van Montreuel, die graue van Soorne, ende noch ambassaten huyt vreemden landen, ende si sijn also te samen in die kercke ghecomen, ende die prinche sadt in sijn siedge, ende dye heeren vander oorden te dier tijt leuende ende doden waren dese. Die coninc van Arragon, dye coninck van Inghelant, heer Peeter van Lannon, Christoffel Marcgraue van Baden, heer Wolfganc van Poleyn, heer Cornelis van Berghen, die here van Santpy, heer Pauwels van Lichtersteyn, heer Wolfganck van Furstenberghe, heer Floris van Yselsteyn graue van Bueren, heer Philibeert van Beueren. Ende daer worden nyeuwe heren vander oorden ghemaect in die stede vanden dooden, ende dat waren dese. Fernande des conincx broeder, coninck van Vranckerijck, die coninc van Vngarien, die coninck van Denmercke. Item.iiij.grauen huyten duytschen lande, die palsgraue, die Marckgraue van Brandenborch, die Marcgraue van Baden, graue Felis, die graue van Porcien, die graue van Montreuel, die Gouernuer van Bresse, Beure die Baelyu van Henegouwe, dye heere van Montigni, die here van Santpy, dye here van Souzelles. Dit sijn die nyeuwe heren, God wilse in eedrachticheyt bewaren. Amen.

¶ Int eerste van desen iare doen starf Ferdinandus coninc van Spaengien, ende die wtuaert werdt te Bruessele seer solemnelick ghedaen. In desen rouwe waren alle prelaten ende staten vanden lande, ende veel triumphen ghebuerden daer. Doen den dienst ghedaen was doen wert den groten standaert ter neder gheleyt. Doen quam hertoghe Karel ende rechte den standaert weder vp. Doen werter den roep ghegheuen, die coninck leeft.

¶ In dit iaer so wart orloghe in Vrieslant ende si namen den hertoge van Gheldre voor haren heere.