Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item corts naer desen midts dat den winder aenquam]

Item corts naer desen midts dat den winder aenquam, sijn dye voorseyde vorsten ghescheyden, want Maximilianus es weder ghereyst nae den duytschen lande. Ende heeft dye coninck van Inghelant ghereetschap ghemaect, omme weder nae Inghelant te reysene, ende heeft die selue Coninck in sijn oordene ende rolle ghehouden ende ghegageert, die Graue van Nassauwen, die heere van Ysselsteyn, dye heere van Linguy, die heere van Walain ende dye Bastaert Daymeries met hueren volcke van wapenen, hoe wel dat niet langhe en duerde. Dat ghedaen sijnde, es die coninck ghereyst na Inghelant, houdende altijt in sijn behout die stadt van Doornicke ende des dien aencleefde, ende heeft die coninck die stadt doen bewaren met Inghelsche knechten, ende daer nae een seer schoone ende sterck slot ghemaeckt, meynende altijt dye voorseyde stadt te houdene tot hemwaerts.

[fol. CCC.v]

[Vpten tweesten dach van Ianuario]

¶ Item ontrent desen seluen tijde vpten tweesten dach van Ianuario, es van leuenden lijue ter doot ghecommen te Bloys vpt slot, Anna die coninghinne van Vranckerijcke Hertoghinne van Bretaengien, ende es begrauen gheweest tsinte Denijs in Vranckerijcke.