Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Naer dat die voorseyde stadt van Doornicke haer ouer ghegheuen hadde in handen des Keysers]

Naer dat die voorseyde stadt van Doornicke haer ouer ghegheuen hadde in handen des Keysers, ende den coninck van Inghelandt, so heeft dye Keyser al daer ghedaen sijn intreye, ende in sghelijcx ooc die Coninck van Inghelant seer rijckelic gheabitueert. Daer na es die Eertshertoghe Karolus ende vrau Margriete sijn goede moeye met hueren vrauwen ende ioncfrauwen inder seluer stadt statelic inghecomen, ende heeftmen al daer heerlick ghetriumpheert, ghetornoyt, ende alderhande Princhelijcke ghenoechte bedreuen.

¶ Item van daer sijn die voorseyde Princhen ende Vorsten met schonen state ghereyst nae die stadt van Rijssele, daer die coninck van Inghelant int incommen sijn magnificentie ende rijckdom ghethoont heeft, ende heeftmen vpgheslaghen die trommelen ende tambouren, claroenen ende trompetten, dwelck den menschen ooren dede verwecken. Ende es al daer byden voorseyde Eertshertoghe den Coninck gheschoncken een seer costelick bancket.