Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Een incident aengaende dye detractien vanden Princhen en Vorsten.

ALso in Exodo in.xxij.ste capittele gheschreuen staet. Dijs non detrahes et principi populi tui non maledices Dats te segghen ghi en sult die goden niet lasteren, noch den prinche van uwen volcke niet vermalediden. So heeftmen dicmale beuonden ende ghesien, ende ooc wort in diueerschen hystorien bescreuen, dat die ghene die yeghens hem ouerste ende Vorsten vpgheblasen hebben met woorden, met wercken, met verachtenisse ende versmadenisse, iniurierende ende beclappende die selue, dat si tot grooter verderffenisse ende perdicien ghecommen sijn. Want die Princhen ende Vorsten huer dominacie ende heerschapie van god almachtich dragen. Ende daer omme seyt Paulus scrijuende totten Romeynen. Alle sielen sullen onderdanich wesen hueren vppersten. Want also int boec der wijsheyt staet ghescreuen int seste capittele totten princhen aldus. Data est a domino potestas vobis, et virtus ab altissimo qui interrogabit opera vestra: et

[fol. CCC.r]

cogitationes scrutabitur etc. Die macht es u ghegheuen vanden here, ende v cracht van den vppersten, die vraghen sal v wercken ende v ghepeynsen ondersuecken. Et potentes potenter tormenta patientur. Dats te segghen dat die machteghe sullen machtelijcke pijne lijden, euen verre si die rechtueerdicheyt nyet voor ooghen en legghen. Ghy hebt ghesien hoe vele steden totten gront toe verdoruen sijn binnen corten iaren herwaerts, midts dien sommeghe onberaden lieden beschimt hebben grote heren ende Vorsten, ende ooc midts der versmadenissen van sommeghen princhen die hueren viant versmaet hebben. Hoe deerlick werdt die stadt van Dynant inden Lande van luycke ghedestrueert, midts die faersen dye si ghemaect hadden yeghens hertoghe Phelips van Bourgoengien ende Kaerle sijnen sone. Ick last staen tghene des onlancx gheschiet sijn mach, het en es van gheenen noode vele exempelen by te bringhene, want dese aengaende alle Cronijcken vol sijn. Laet ons daer omme sonder blamacie die princhen inder rechtueerdicheyt hen landen laten guberneren, want si inden handen gods staen, ende nyet inder ghemeynten bedwange. Maer wi behoren so te leuen ende gode almachtich te bidden, dat hi ons princhen ende vorsten verleenen wille, dat dye verchiert moghen sijn metten chierace, daer mede dat dye wijse coninc Dauid aen god almachtich begeerde Salomon sijnen sone ende die sone ooc selue verchiert ende gheexorneert te sijne, te weten met godlijcke wijsheyt. Dwelck ons god almachtich verleenen wille, soe dat wy alhier in dese bedructe wanckelbare weerelt in paeyse, ende hier namaels in paeyse ende vrede leuen moghen.