Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Item in dye maent van Maerte so quamen diueersche gedeputeirde van sommeghe nacien.

Te wetene Oosterlinghen ende andere, omme te communikierene met dye van Brugghe, om dat elc soude moghen blijuen in sijn recht van ouden tijden.

¶ Item.xi.in Maerte Anno.xcij.so biecken die backers van Brugghe weder taerwen broot van.iiij.mijten, ende corts daer nae oock regiert ende wit van.iiij.mijten, twelc binne.v.iaren nyet ghebuert en hadde. Lof is god.

¶ Item den.xx.sten dach in Meye. Anno xciij.so was die hertoghe van Zassen binnen der stede vander Sluys, ende visenteirde beede die casteelen, ende eeneghe vanden poorters vander Sluys die maeckten hem huyten weghe.

¶ Item in dye selue maent soe waren ter sluys vele persoonen gheuanghen, byden beuele vanden hertoghe van Zassen, ende van dien wasser drie onthooft, ende dat ter cause dat si riepen als die hertoghe van Zassen binnender sluys quam, eenighe Rauesteyn, ende dandere Oostenrijcke. Ende.xviij.persoonen warende ghebannen, ende een priester vander Sluys moeste oock die stede ruymen.