[Item vp den.xxv.sten dach in Lauwe vp Sinte Pauwels dach],
Item vp den.xxv.sten dach in Lauwe vp Sinte Pauwels dach, ende was vp eenen vrydach, soe wast een seer onghetijdich wedere van winde, van sneeu, van dondere ende van blixeme, soe dat ontrent den een hueren naer die noene ontstack den torre vander ouder halle, te wetene tbeelfroot, int alder vpperste van den torre recht onder Sinte Michiel, dier doe bouen vp stont, so varre dat den torre al verbarnde dye gheheel cappe ende al thout werck tot vp die vaulte daermen tlof tsauents speilt, ende die clocken ende schellen smolten duer den grooten brant, ende men mochte gheen weere ghedoen, ende daer bleef een oudt schoelapper doot inden torre, midts dat hy hem te varre auanchierde, ende sinte Michiel dier vp stont viel metter spille vpt dach, dat tgrote schade dede Ende van dien viere ontstack eenen looden appele bouen vpt dack vander vanghenesse dye welcke men terstont of saechde, ende wiert alsoo ghebluscht. Ende vanden seluen ongheweirte so verbarnde vp den seluen voorseyden dach den torre van onser vrauwen kercke ter Sluys, int iaer ons heeren duysent vier hondert ende twee en tneghentich.
M ichiel den enghele men.vij.iaer sach
C hierlic vp die halle bi wijsen bestiere
C ompasselick te Brugghe nederlach
C laghelic lacen vp sinte Pauwels dach
C locken thor verbrande bijden helschen viere.
X pristus weet cause deser wreed' maniere
C laer warachtich dit viandelick abuys
I uuste gheuiel ooc also putertiere
I n onser vrauwen thor ter Sluys
Auteursrechtvrij