Dits die Excellente Chronijcke van Vlaenderen
(1531)–Anoniem Dits die excellente cronike van Vlaenderen–Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]
[Folio CC.lxxi.r]
| |
Die baerdge van dancbaerheden is weder ghekeert.
Als hebbende voorspoedich voyaedge ghedaen.
Dye haers rapoorts wil sijn gheleert.
Sal sondaghe claer verstant ontfaen.
¶ Nota.
¶ Ende vp den seluen sondach auent wo waren ten beelfroote huyt gehangen wel.vic. lanteernen elck met een barnende keerse van bouen, daer als doe stont sinte Michiel tot beneden toe, twelc seer schoone om sien was. int selue iaer.xiiijc.ende.xc.den.ij.sten in Lauwe
¶ Item mijn heere van Nassauwe vertrac vander stede van Brugghe vp den achtsten dach van Lauwe naer Hulst, daer als doe een dachuaert lach van alle dedele vanden lande, ende dat om datmen gheerne een goet apointement soude maken tusschen mijn here Phelips van Rauesteyn, ende alle die edele van Sprinchens landen, want van dien gheschille noch groot dangier quam der stede van Brugge ende ooc tghemeene lant van Vlaendren, maer ten ghinc niet voort.
¶ Item es te wetene dat die stede van Brugghe, aenghesien den tijt diet gheweist hadde groot goet tachter ende schuldich was van renten ende andersins, waeromme dat gheconsenteirt was om die stadt tontlastene eene kalioote vanden graue.ij.iaer lanc gheduerende, maer si ghinc wel.xx.iaer eer si al of gherochte. Ende men gaf eerst van een hoet taerwen.xxx.groten, van kalioote, vanden rugghe.xx.groten, ende al ander graan in aduenante.
¶ Ende es te wetene datmen kalioote gaf van alle maniere van goede, van coeyen, van schapen van calueren, van lammeren, van buetere, van case, van soute, van vissche, ende van allerhande etelicke ware, van barning houte, van turuen ende van buscolen, van foraedgie, vanden ponden groten.xij.groten. |
|