[Item men sal weten dat die somme die die van Brugge gheuen moesten mijn heere van Nassauwe]
Item men sal weten dat die somme die die van Brugge gheuen moesten mijn heere van Nassauwe ter cause vanden paeyse, bedrouch.lxxx.duysten ponden groten, waer of dat si teen derde vinden moesten binnen.viij.daghen, ende dander payment te sint Ians daghe midsomers daer naer, int iaer.xci. Ende tghelt vanden eersten paymente was gheuonden in deser manieren, te wetene dat elck hooft van mans ende vrauwen ende kinderen, also wel dienstboden als andere, die moesten betalen voor elck hooft.x.schellingen groten. Te wetene hootghelt alsoot toe noch ghinc. Voort alle die huysen staende binnen der stede, wien si toe behoorden, also wel cloosters prochyekercken als andere, moesten gheuen voor elc huys dat een libra tsiaers galt moeste gheuen.x.schellingen groten, ende alle die huysen die min golden dan een libra groten dye en gauen niet, maer alle dander die meer golden dan een libra groten tsiaers in hueren, die moesten betalen voor elcke eerdtstede dye binnen den huyse waren.x.schellingen groten, wel verstaende alsoot tghelt doe ghinc, dat was eenen gouden guldene, die dede als doe.x.schellingen groten, ende dit was al so ghesloten inden paeys, die huytgheroupen was vp sinte Niclaes dach, den.vi.sten in Decembre. Ende daer was een ghebodt ghedaen metter clocke, dat elc moeste betalen sonder delay, vp daer of ghecorrigiert te sijne. Ende dit was vp den.x.sten dach van Decembre. Anno.M.iiijc.xc.
Auteursrechtvrij