Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item mijn here van Nassauwe]

[Vanden eersten dach van Hoymaent tot int laetste van Nouembre]

Item mijn here van Nassauwe sandt terstont aen die van ghendt dat si souden willen laten passeren eenege schepen met coorne, ten behouue van die van Brugghe, want si groot ghebrec van coorne hadden. Waer vp dat die van Ghendt ontboden dat si gheen coorne ontbeeren en mochten, noch gheen te vele en hadden. Daer bleec wel die vrientschap die si de van Brugghe ionden, daer si nochtans ghenouch die orlo

[fol. CC.lxx.r]

ghe omme aen namen, omme dat si by die van Ghendt blijuen wilden, ende tghelt niet anders of stellen en wilden dan alsoot die van ghendt stelden dat was ten helfte, maer lieten die van Brugge inden noot sonder hem lieden eeneghen bystant of sercours te doene, daer si nochtans waren vanden eersten dach van Hoymaent tot int laetste van Nouembre, dat si nauwe eenen voet buyter poorte en mochten stellen ende screuen alle daghe om sercours ende bystant aen die van ghendt. Die welcke hem lieden niet en daden, maer lietense alleene inden brant, ende hilden dat sy hadden ende sweghen al stille. Huyten welcken ic dit scriue teender memorie ende ghedinckenesse dat ic die van Brugghe niet raden en soude te sijne of yet te doene contrarie hueren Prinche of ooc eenege grote heren, ter cause vanden broederschepe diemen hem lieden toe bewees.