Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item dus onse ambassaduers van Brugge wesende te Parijs den vierden dach van Septembre]

Item dus onse ambassaduers van Brugge wesende te Parijs den vierden dach van Septembre, ende gesproken hebbende met den.Coninc.ende sijnen hogen raet, die welcke ghesloten ende ghemaect hadden eenen goeden vasten ende gheduereghen paeys tusschen die.iiij.coninghen voorseyde, die te houdene ende tonderhoudene. Ende dat den paeys van desen lande staen soude int seggherscip vanden coninc van Vranckerijcke als voorseyde es. Waervp die voorseyde ambassadeurs antwoorden dat si in huerlieder persoone wel te vreden waren, in dies den coninck gheliefde of daer of segghen soude, maer en souden tvoorseyde seggherschip niet durren affirmeren huyt huerlieder auctoriteyt, sy en haddent den lande laten weten dat daer vp stoet. Ende wilden si paeys hebben dat sijt confirmeren souden, ende hem lieden ghetroosten int goet seggherschip vanden coninck van Vranckerijcke. In twelcke den coninc consenteirde datmen soubijtelic seynden souden eenen bode omme dantwoorde. Twelck terstont sonder letten ghedaen was. Waer vp men alle ghemeente dede vergaderen, hem lieden vraghende of sy daer in wilden consenteren of niet. Waer vp si alle agointelick seyden iaesy, ende submitteirden hem int segghen vanden coninck, waer of dat dantwoorde subijtelic ghesonden was te parijs waert byden coninck.