[Item vp den.xxviij sten en den laetsten dach van Septembre]
Item vp den.xxviij sten dach van Septembre, so waren die van der wet van Brugge, ende mijn here van Peenen te Rade met die Casselrye vanden west quaertiere, omme te wetene of si wilden betalen.vi.groten van elc ghemet lants, men soude dat quaertier suueren, ende of worpen Dixmude ende Nyeupoort, ende meer ander smalle steden, maer die vrylaten en wildens nyet doen. Ende ghinghen daer omme al verloren, ende worden berooft, verbarrent, gheuanghen, ende al te nieten ghedaen. Ende noch den laetsten dach van Septembre, so vertrack mijn heere Ioris van wateruliet van Anxame te Dixmude binnen, ende bedrooch alle dat lantsvolc van dien quaertiere, want sy moesten doe alle ruymen ende vluchten, want die vianden quamen te Anxame vp tcasteel ligghen, wel.iijc. knechten vanden coninck van den Romeynen, die welcke veil quaets deden alle daghe tusschen daer ende Brugghe, als van die lieden te vanghene, te beroouene, ende doot te slane.
¶ Item den laetsten dach van Septembre, so vertrac mijn here van Peenen naer sint Omaers wech van Brugge, ende maecte capiteyn in sijne stede missire Anthoine danchy, omme dat te verwarene in die stede van hem, maer daer en bleef gheen volc van wapenen, waer bi die vianden deden in twest quaertier veel quaets, want si wisten dat te Brugghe gheen garnisoen noch volc van orloghen en was, aldus so hadden sijt schone om veil quaets te doene, want daer en was nyement teghen.
Auteursrechtvrij