Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item den.xxiiij.sten en den.xxvij.sten dach van Hoymaent]

Item den.xxiiij.sten dach van Hoymaent vergaderde mer Phelips van Rauesteyn met monseur des Cordes, ende mijn here van Beuere, ende mijn here van Spiers, ende hilden raet den.xxvij.sten dach vander seluer maent, ende sonden van Ipre een duyst voetknechten, calueueriers ende stalen boghen, ende andere stocken te Brugghe waert, waer of men deene heltscheede sandt ter stont te Muenickereede waert, buyten den Damme, om te belettene die duytschen dat si ouer twater niet en souden commen int noortvrye. Ende daer quamen ooc noch hondert knechten van Ipre, die de stede van Ipre sandt tharen coste, ende waren gheleyt ten Damme, omme den Damme te helpen bewarene.