Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item vp den.xvij.sten en en.xxiiij.sten dach van Meye]

Item vp den.xvij.sten dach van Meye voorseyde, van dat mer Phelips van Rauesteyn ende mijn here van Beuere vanden Coninc weder int stede ghekeert waren, so en was tgarnisoen vanden coninc niet te bestieren, noch men constet niet ghedoen vertrecken, ende princepalic die ouergheloopene ende inboorlinghen vander stede van Brugghe, die de voorseyde stede meer leedts ende schimps deden dan ander vreimde ruyters, ende ooc noch andere ingheborene tslandts vanden Vryen, want naer tverbodt vanden coninc rebelleirden, ende staken tvier in tcasteel van Male, ende noch in twee of drie pachtgoeden daer ontrent. Waer of dat dye mare ghinck dat dat daden vleeschauwers van Brugge, te wetene Aernekin breydele, ende een vanden gheslachte vanden Basseuelden. Ende teenen anderen cante tusschen der speypoorte ende der cruyspoorte waren eenege van dier ghelijcke als voren, ende schoten in die stede viere engienen steenen ende loot, maer daer en was nyement of ghequetst, twelck was gods gracie. Het welcke den coninc vanden Romeynen te hooren quam, daer omme dat hi seer verstoort was, ende swoer teerste die hi ontrent den viere vonde hy soudene daer inne doen worpen. Want hadden die van Brugghe naer hem lieden willen schieten, si soudense vermoort hebben met groten hoopen, metsgaders dat si hem quamen vertooghen ten wijpre van die van Brugge, met groter menichte al varre binnen den schote, waer omme die coninc dede so vele dat si al tghemeene naer die noene vertrocken. Ende die coninc vanden Romeynen quam ghereden met vele duytsche heren, al daer hi dede ontbieden alle die heren ende notabele vander stede buyten der poorte, ende sommeghe ghedeputeirde vanden lande, ende badt hem lieden daer een vriendelijcke bede, omme te gheuene den capiteyn vanden Keyser sijnen lieuen vadere eene cleene somme van penninghen, want hi grote cost ghedaen hadde ende gheen quaet. Maer die coninc seyde datter waren wel.vi^c.ghesellen van Brugge ende van binnen den lande die hi noch qualic bestieren conste, maer soude remedie daer yeghen doen naer sijn vermueghen, ende gafse der wet een deel ouere in ghescrifte, by namen ende by toenamen vp dat sijse naer der hant daer of souden moghen corrigieren, wantet hem pijnlic ghenouch was dandere te doen vertrecken also sijn belofte was, ende daer toe ooc zijn beste dede nae ghelegentheit der sticken. Ende logierden noch som Tardenburch ende te Middelburch in Vlaendren, daer sy noch bleuen, ende deden noch alle daghe al tquaet dat si consten en mochten, vanden lieden te vanghen, van huysen te verbrandene, ende namen den landtslieden haer beesten ende al dat si ghecrijghen consten, ende bleuen daer noch tot den.xxiiij.sten dach van Meye. Want daer was een duytsch heere dye Middelburch voor hem houden wilde, ende hem quam te baten eenen gheheeten Rijcke de visch, die toe behoorde tcasteelkin van Cocxye, met ontrent.xxx.peerden, ende.lx.ghesellen te voet alle quade bouuen, die welcke vele quaets hielpen doen ouer die lieue, den seluen dach al voren.