Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item voort achtervolghende, naer den huytroupene vanden seluen paeyse]

[Den.xvi.sten en xvij.sten dach van Meye]

Item voort achtervolghende, naer den huytroupene vanden seluen paeyse, ende dat den.coninc.vanden Romeynen vp sijne vrye voeten ghestelt was. Ende ghebuerde den.xvi.sten dach van Meye smorghens voor die noene, so trac den voorseyde Coninck vanden Romeynen huyter stede van Brugge te Male waert, met Phelips van Rauesteyn ende mijn here van Beuere, want die duytsche heren hadden daer haer tenten ende pauwelioenen ghesleghen. Ende die.Coninc.daer commende, si waren seere blijde, ende si triumpheirden. Ende die coninc seyde hem lieden dat si lichten moesten, also si terstont deden, ende vertrocken achterwaert. Maer mer Phelips van Rauesteyn ende mijn here van Beuere quamen terstont weder te Brugge, aengesien dat mer Phelips moeste gaen trecken in ostaegien te Ghendt waert, ende omme dat dye heren die daer gheuanghen waren souden den vierden dach naer den paeys commen te Brugghe, ende het commuyn van Brugghe souden hem lieden ghebeden hebben omme haerlieder gracie ende absolucie alsoot besloten was inden paeys. Ende sie lieden souden insghelijcx ghedaen hebben ter cause vanden regemente, want si nyet meer regement hebben en souden, alsoot inden seluen paeys verbonden staet, die welcke ten Schepenhuyse huyt ghelesen was ende ghetoocht met alle den seghelen daer aen, waer omme dat tvolck als doe seere blijde was, ende dancten gode van sijnder gracie dye ghebuert was, ten profijte vanden hertoge Phelips onsen prinche ende van sijnen landen. Ende terstont deidemen een ghebot ter hallen huyt, te draghene eene deuote processie generale, in welcke processie men drouch het weerde helege bloet, om god te danckene dat den paeys was ghemaect sonder meer bloetsturtinghe, naer tgroote discoort dat tusschen alle die landen was, twelck was vp den.xvij.sten dach van Meye. Ende vp den.xvi.sten dach van Meye was ooc gheboden, so wie sauens tbeste spel huytbringhen soude, souden hebben.viij.cannen wijns, tware in tvroede of in tsotte. Ende so vie schoonst vieren soude, in sgelijcx ooc.viij.cannen wijns ende daer naer.vi.ende.iiij.Ende datmen voorsie-

[fol. CC.liij.r]

neghe wake soude houden vp auentuere, wie onse vrienden niet en waren, ende datmen nyement vanden garnysoene vanden coninc in en soude laten, noch ooc yement anders etc.