Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[Item corts daer naer so quam die Roomsche Coninck voor dye stede van Brugghe]

[Den dach van sinte Mathijs en den.xxi.sten dach in Maerte]

Item corts daer naer so quam die Roomsche Coninck voor dye stede van Brugghe met groter macht van volcke, waer of datter grote menichte waren vanden eerlicsten inde rijcsten vander stede met hem toe waren, die corts daer naer waren onthooft, omme dat si den Roomschen coninck meenden in ghelaten te hebbene, maer hi quam eenen dach te late, metsgaders dat scrickel iaer was, ende den dach van sinte Mathijs. Ende waren doe Burchmeesters vander stede van Brugghe Ian van Ryebeke ende Lodewijck Steylin, ende was doe Schouteeten van Brugghe mer Ian van Nyeuwenhoue.f.Clays. Ende vp desen seluen tijt so waren beede die casteelen vander Sluys wel voorsien van engienen ende van volcke van wapenen, ende waren toe metter stede. Ende corts daer naer so was het schip van Ian van Ryebeke ghenomen vanden schepen vanden Roomschen Coninck.

¶ Item vp den.xxi.sten dach in Maerte, doe was ter Sluys onthooft ende ghequarteleirt een Saudenier vanden groten Casteele, ende was een maetsenare, dye welcke een grote somme van penninghen ghehadt soude hebben, midts dat hy een groot gat ghemaect soude hebben inden thorre vanden Casteele neffens den watere, ende soude daer alsoo inne ghelaten hebben des Roomschen Conincx volck. Ende dit quam huyte bi sijns selfs clap in dronckenschepe Nota bene.

[fol. CC.xxvij.v]

¶ Item binnen deser tijt soe maeckte dye Roomsche coninck groote ghereeschepe, omme met sijnen schepen weder te commene in tzwijn ter Sluys, ende meer schepen dan hy te voren ghehadt hadde. Ende binnen dese middelen tijde, so quam een groote vlote van schepen huyter baeye gheladen met soute ende met wijne. Ende dye vander Sluys trocken huyte met haren schepen, ende metsgaders die Fransoysen die doe ter Sluys laghen namen alle die voorseyde schepen dye daer quamen, ende brochtense ter Sluys binnen.

¶ Item in desen seluen tijt namen die van der Sluys groote menichte van visschers wel gheladen, ende vinghen die meesters vanden schepen, ende brochtense ter Sluys, daer si groot rentsoen of hadden.