Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

Dit gheschiede binnen den Iare.M.CCCC.ende.lxxix.

¶ Item vp den seluen tijt soo ghebuerdet, dat die landen seere besich waren, hoe datmen sconincx mogenthede best wederstaen soude. Ende men waecte snachts al Vlaendren duere, lancx den zeecant, vander sluys tot Greuenijnghe toe, om dat die fransoysen aen die sijde van Vlaendren nyet landen en souden. Ende elck huys man was voorsien te lande waert van harnassche ende ander gheweere, vp auentuere wanneer dattet van noode ware. Ende al Vlaendren was voorwaer of dat mijn heere die graue van Rommont Capiteyn generael was.

[Den.xxij.sten dach van April.Anno.lxxix en den.xxiiij.sten dach van April]

¶ Item vp den.xxij.sten dach van April.Anno.lxxix.so was gheiusticiert vanden souuereyn Baliu van Vlaendren, of sijn stedehouder, gheheeten Ian Breydel, eenen man die welcke was ghehanghen aen een nyeu galghe, byden cloostere vanden Iacopijnessen, die welcke was gheuanghen te Varsenare aen tkerchof, vp sijn camere daer hi sliep, hem verlatende vp een veynstere dye aen tkerchof quam. Maer was verradelic bespiet van eenen dye Souuereyns dienare was, ende was nochtan gheuader vanden mesdadighen, die hem tanderen tijden grote vrientschap ghedaen hadde, omme twelcke hi dat den seluen dienare niet vergheuen en wilde, voor int huyterste artijckle vander doot, maer noch wast ter quader trauwe. Ende dese was te Brugghe ghebannen.vi.iaer lanck vp die galghe, ende lach daer te Varssenare als voorseyde es, nyet hebbende landt, noch oock gheleede vanden Souuereyn.

¶ Item vp den seluen dach, ende was sint Ioris auent doe rees binnen dier nacht een groot ongheweirte, daer groote schade of quam inder stede van Brugghe, ende in andere diueersche plaetsen daer ontrent gheleghen.

¶ Item den thorre vanden Iacopijnen was meest alle die schaelien of ghenomen. Ende in tsuster huys vander derder oordene daer verbarnde een scholaken vanden voorseyden blixem, ende eenen tynnen platteel worter ghesmolten, daer nochtan ander platteelen bi stonden, die niet ghesmolten en waren. Ende in die prochye van Keyhem verbarnde een gheheel hofstede, huysen, scueren, schapen, coeyen, ende alle die katheylen vanden huyse, sonder twee of.iij.peerden die sauents te voren in die wee gheiaecht waren. Ooc was den thorre van Oostende seere gheschent, als wel blijct in die Incarnacioen.

Sware schade rees vp sint Ioris nacht
Bij blixeme ende des donders cracht

¶ Vp den.xxiiij.sten dach van April quam die Prinche in die stede van Brugghe met sijne gheselnede, ende quam van Ghendt.

[fol. CC.xij.v]

Ende vp dien seluen dach wast brant in dye clop hamerstrate wel van.xij.eertsteden.