Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe die Hertoghe Kaerle track naer Loreynen, ende deder daer vele hanghen die hem contrarie gheweist hadden.

[fol. C.lxxiiij.r]

[In tselue Iaer van.lxxv.]

ITem in tselue Iaer van.lxxv.trac hertoghe kaerle met groter macht in Loreynen, daer hy scerpe iusticie dede vp die ghene die hem langhe contrarie gheweist hadden, want hi deder hangen wel tot.c.ende.xl.personen

¶ Item binnen den seluen iare waren eenege personen binnen Atrecht, die de stede van Atrecht verraden souden hebben, ende ouerghegheuen inden handen vanden fransoysen vp eenen dach datmen daer drouch processye generale, maer byder gracie gods men wierts gheware, ende die mesdadeghe waren gheiusticiert.

[Den.xij.sten dach in Octobre en vp den.xxiij.sten dach vander seluer maent]

¶ Item in tselue iaer den.xij.sten dach in Octobre, so quamen seker mandementen aen den Baliu, schouteeten, burchmeesters, schepenen, ende raet vander stede van Brugghe, hoe dat seere ghelaboreirt was tusschen den Coninck van Vranckerijcke ende den hertoge kaerle, als dat ghesloten ende gheconcludeirt was warachtich bestant van.ix.iaren, tusschen den coninc ende den hertoghe voorseyde, so dat die coopman vry varen ende keeren mochte ouer beeden sijden. Maer vp den.xxiij.sten dach vander seluer maent, so was'tvoorseyde bestant warachtich huyt gheroupen ter hallen, tusschen den coninc ende den hertoge voorseyde, het welcke bestant inghinc den.xiij.sten dach in Decembre Anno.lxxiiij.tot dat den termijn van.ix.iaren gheleden sal sijn, in welc seggherscip ende appointement den Hertoge kaerle toe gheseyt was die stede van sinte Quintins, met vele andere diueersche redenen. Ter welcker cause men te Brugge drouch eene deuote processie generale, sint Saluators, vp den.xxiij sten dach van Octobre. Anno.lxxv. Ende in die voorseyde processye waren ghedreghen den Fiertre van mijn here sinte Donaes, ende van sinte Bonifacius. Ende was helich dach gheboden dyen dach. Ende sauens waren veil schone vieren gemaect, ende ander vrolicheden bedreuen

Es mildelick neghen iaer bestant.
¶ Meerst hope ghi die bi dancke claecht
Die claerheyt van trooste heift ons bedaecht
Gods caritate es wijde ontdaen
Dedel coninc die de lelien draecht
Es ghebleuen content, twelc ons behaecht
Inneghen iaer lanc bestants vermaen
Den leeu wil xpristus in staden staen.
Ende hem beschermen voor lijdens gru
Tsint saluators salmen vrolic gaen
In processie te brugghe maria lof hu.

[In dye maent van Nouembre en vp den.ix.sten dach in Decembre]

¶ Item in tselue iaer in dye maent van Nouembre, so was den staet vander stede van Brugge ouersien. Ende het was ghesloten byden heren ende der wet, ende byden.vi.hooftmannen, ende alle dye Dekenen, dat elc hoet taerwe gheuen soude van kaliote.iiij.groten, ende dye rugghe.ij.groten, ende voort alle andere granen in aduenante. Ende waren ghecoren drie ontfanghers van der stede assijsen. Te wetene Ian van ryebeke, Ian die blasere, ende casin pierins, dies en souden si in gheene wetten sijn. Ende dit was ghedaen bi ottroye vanden prinche, drie iaer gheduerende. Ende dese ontfangers saten in een huysekin aen die west sijde vanden braemberch, toebehorende den hudeuetters in Brugghe. Ende binnen der tijt dat die ambachten van Brugghe vergadert waren om dit te concenteirene, so was ten freren inden ommeganc eenen brief gheplact aenden muer met quaden ghescrifte, seer spijtich sprekende vp die wet ende vp die Dekenen, seer quade ende horribele woorden hem lieden aengaende, om twelcke sommeghe personen gheuanghen, gheexamineirt, ende ooc ghepijnt waren. Ende daer naer so was vp den.ix.sten dach in Decembre noch sulc eenen brief ghestelt, twelc was wel een saecke om moeyte of meuterye te makene onder tvolck.

[In dit voorseyde iaer van.lxxv]

¶ In dit voorseyde iaer van.lxxv.soe gheliefdet onsen heleghen vader den paeus Sixtus die vierde, datmen te Roome hilt tiaer van gracien, ende ordonneirde datment voor aen houden soude, telcken.xxv.iaren, twelcke als doe teerste was.

¶ Item int selue iaer was mijn here Anthonis die bastaert van bourgoengien te Rome daer hi met grooter eeren ontfangen was, vele cardenalen ende bisschoppen hem te ghemoete rijdende. Ende hy wart daer ghelegitimeirt ende ghemaect als ghetrauwe kint. Ende alle dye steden van Italien ontfinghen hem met grooter eeren.

¶ Item tes te wetene dat in dit bestant van.ix.iaren, dies voorseyde es, die graue van Simpol huyte ghesloten was om sekere causen daer toe dienende. Ende bouen dien so ghinck dye mare achter hem al Vranckerijcke duere, als

[fol. C.lxxiiij.v]

dat dye graue Lodewijck van Lutcenburch voorseyde, graue van Simpol, ende conincstable van Vranckerijcke, dat hy cause was van alle die gheschillen ende oorloghen diemen rijsen sach tusschen den.co.ende den hertoge Kaerle, ende dat om sijn singulier profijt. Ende dat hi tlant van Vranckerijcke grotelic gheten hadde in den ontfanc vanden volcke van wapenen, rekeninghe doende voor.iij^c.glauyen, darer dicwils niet.C.en was het welcke groten schat bedrouch grotelic te sinen profijte. Ende men leyde hem te laste dat mesier Iaques de Simpol hem vanghen liet buyten Atrecht, dattet bi sijnen rade was.

¶ Item voort dat sijn sone mijnhere van Ronchy die Zwitsen liet commen in Bourgoengien, ende liet hem steden verbarnen, ende tvolck vermoorden.

¶ Item voort tvergheuen vanden hertoghe van Gwyenne, met seyde dat die coninc dat bi sinen rade dede doen. Voort dat hi sijn eenich wijf vergaf met venyne, suster sijnde vander coninghinne van Vranckerijcke, om dat hi niet en wilde dat die kinderen die van hem ende van haer commen souden meer verheuen souden wesen dan sijn eerste kinderen, dye gedescendeirt waren huyten houe van ghistele

¶ Item men leyde hem te laste dat sijn meeninghe noch was den.coninck.van Vranckerijcke,ende den hertoge van Bourgoengien noch te vergheuene, om selue noch met sinen gheslachte het regement te hebben. Aldus die here van Simpol hem beduchtende van qualic te varen, ende dat al sijn quaet huyt commen soude, vloot huyt Vranckerijcke te Berghen in henegauwe, om beschut te sijne onder hertoge.Ka.protectie.

¶ Item corts daer naer quam die Cancelier van Bourgoengien daer by hem, om quansuys met hem te collacionerene. Ende hi dede so vele dat si tsamen reden spelen, aldaer die cancelier secretelic volc van wapenen hadde verborghen. Ende daer was die graue van Simpol gheuanghen, ende ghedeliuereirt den fransoysen, die daer naer wachtende waren. Ende hy was gheuoert te parijs, ende geleyt in behoudender hant gheuangen.Anno.i479. in octobre