Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[fol. C.lxxiij.v]

[Als Hertoghe kaerle quam ende ghescheeden was vanden Coninck van Inghelant]

Als Hertoghe kaerle quam ende ghescheeden was vanden Coninck van Inghelant, quam hi te Brugghe daer die drie staten vanden lande vergadert waren, den welcken hy een seer lanck relaes dede, hem grotelic beclaghende, ende hi seyde datmen hem nyet gheobegiert en hadde in sijne mandementen. Niet yegenstaende datmen hem was gheuende al dat sijn Cancelier heeschende was, maer hoe dat beleet was, dat beuelic gode. Heyndelic die prinche sprac seer scherpe woorden, segghende. Ghi sult mijn mandementen bet obegieren ende ooc mijnen Cancelier, of ick sal hu betooghen dat ghi mijne vianden sijt. Ende si sweghen alle. Ende hem was toe gheleyt vanden vier leden het ghelt van vier duysent mannen, van vier maenden te voren betaelt. Twelc bedrouch die somme van.xxvij.duysent croonen, ende alle die officien van Vlaendren waren verpacht. Ende dit en was noch nyet ghenouch, hy hadde noch huyt Vlaendren C.duyst Rijders siaers, drie iaer lanc gheduerende. Ende te Brugghe was een mandement ter hallen huyt ghelesen, dat hem nyement moeyen en soude te clappene, in wat manieren dese twee coninghen eens gheworden waren so corts, ende dat vp scherpelic ghecorrigiert te sijne.