Dits die Excellente Chronijcke van Vlaenderen
(1531)–Anoniem Dits die excellente cronike van Vlaenderen–Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]
[Folio C.xxxvij.r]
| |
Die moghende Prinche Kaerle dye hadde sijnder gheminder bruydt ghesonden drie nyeuwe hanghende waghens, seer rijckelic ende costelic, Ende eenen osbare seere rijckelic gestoffeirt al van sijnen goude, met eender C ende met een M besaeyt, ende ooc met bloemkins van margrieten, ooc hadde hi huer ghesonden vele witte tellenieren, bouen den ghetale van die si huyt Inghelant brochte, want sy quam seer rijckelic ouer, wel met.xvi.sware schepen, met vele edele ioncheeren ende vrauwen ende grote menichte van familie, ende si quam van den Damme naer die stede van Brugghe vp den derden dach van Hoymaent, ende was eenen sondach ende ooc sint Thomaes den Apostel dach met groter heerlichede, als ghy hier naer hooren sult.
¶ Item smorghens ontrent den.ix.hueren begonsten dye peerden in te commene ter cruyspoorte, die gereden waren yegens dye voorseyde Princersse ende bruydt, ende ooc die peerden die met huer quamen huyt Inghelant, so dat tgetal vanden peerden sie met haer in quamen was wel.xic. Eerst so quamen voren die dienlinghen vanden Hertoghe Kaerle, al ghecleet int swarte, Te weten sulc in swarten Fluweele, andere in Damaste, ende in sijden lakene naer dat si van state waren, ende in officien, ende waren tsamen wel twee hondert peerden.
¶ Item mijn heere Adriaen van Borsele Ruddere, ende here van Breedam reedt rijckelic verchiert, sijn peert met fluweel verdect, ende daer vp hangende vele selueren bellen die groot waren, ende hi hadde drie paedgien, wiens peerden verchiert waren met swarten fluweele ghelijc sijn peerdt daer hy vp sadt, doen quam Pieter monseur pieter de Borbon, sijn peert verchiert met peerschen fluweele, ende daer aen hanghende vele schoone selueren bellen, ende aen dander sijde.ij.grote silueren cakebeenen
¶ Voordt daer naer so volchden wel.x.Bisschoppen. Eerst een legaet van Roome, die Bisschop van Typere, die Bisscop van Salsbry, die Bisschop van mets, dye Bisscop van Vtrecht, dye Bisschop van Camerijcke, die Bisscop van Doornicke, die Bisscop van Sareyten, ende vele ander biscoppen ende prelaten
¶ Item daer naer volchden vele trompetten ende claroenen metten blasoenen van Ingelandt, ende van den Hertoghe Kaerle, wel tot twijntich of meer. Voordt daer naer, so quamen vele Herauten metter wapene van Inghelandt, ende ooc vanden Hertoghe Kaerle, ende ooc vanden Graue van Simpol, Adolf van Cleue, vanden Here van Schales, Ende meer andere grote heeren, ontrent den ghetale van.xxx.
¶ Item daer naer so quam die voorseyde bruyt sittende in eenen rijckelicken osbaer, gedreghen van.ij.swarte peerden, met ghetuge van root gouden lakene, ende Margriete die bruyt voorseyde sadt in hueren osbare, met den hangenden hare, also eene bruyt toebehoort, ende hadde aen eenen froc ende eenen mantele van witten gouden lakene, ende een costelic Colet van goude verchiert met diueersche ghesteenten ende costelicke peerlen hadde si ontrent huren hals, ende aen haer hant eenen traurinc, twelc was een groot point van eenen Dyamant, ende daer neffens aen den seluen rinck vier tafelen van Dyamanten, ende Robijnen ende costelicke peerlen.
¶ Item tes te wetene dat vanden Damme tot Brugge quamen.vi.Rudders huyt Inghelant, neffens den osbaer te voet, in manieren van bruytleeders. Ende commende ter cruyspoorte, daer ontfinghen haer.vi.ander rudders. Te weten heeren vanden Toysoene. Eerst mijn heere Adolf van Cleuen Monsuer Iaques de Lutcenburch Anthonis die bastaert van Borgoengien Philippe pot Monseur de Charny Phelippe de Crieuekuer
¶ Ende dese ghinghen neffens den osbaer te voet, tot int hof van Borgoengien. Ende daer ontrent ghinghen die aertchiers vanden Hertoghe Kaerle, ende oock die Aertchiers van Anthonis die bastaert met selueren iorneyen, ende daer in staende eenen boom van Orseuereye.
¶ Ende es te wetene dat buten der cruyspoorte quamen met processye dye ioncvrauwen vanden wijngaerde, gheseyt beghijnen, Ende presenteerden der Bruydt eenen hoedt ghemaect van roosen, so eerlick ghewrocht, dat men sghelijcx niet vele gesien en hadde, den welcken hoedt die Bruydt in groten dancke ontfinc. Ende si dede den hoedt blijdelic stellen binnen harer croone, die si vp thooft hadde. | |
[Folio C.xxxvij.v]
| |
¶ Item naer den seluen osbare volchden xij.tellende witte hakeneyen, ghetughen ende sadelen al vercleet met root gouden lakene, ende vp elck sadt eene ioncfrauwe ghecleet met diueersche sijden abijten aen, ende waren alle ghepareirt vp dinghelsche maniere.
¶ Item daer naer volchden noch.iij.hanghende waghens alle verghult ende verchiert metter deuyse vander voorseyde Margriete, welcke waghenen waren alle vercleet met rooden gulden lakene, ende voort warer noch twee waghens vander ouder princhersse, vercleet ooc met rooden gulden lakene. Ende alle dese voorseyde.v.waghens saten alle vul vrauwen ende ioncfrauwen, midts datter vele vrauwen waren ghecommen ouere te Calis, ende waren van daer te Brugghe ghecommen ouerlandt. Item alle dye nacien hadden haer deuoor eerlick ghedaen om den ontfanck vander voornoemde bruyt, hem lieden costelijc cleedende, ende hadden al ghehuert huysen in die strate daer si passeirde, die si costelic behanghen hadden met gulden lakenen, ende andersins. ende met huer lieder wapenen daer voren, ende die gheuelen vanden seluen huysen waren al besteken met barnende tortsen seere chierlick om sien.
¶ Item ter incomste vander voorseyde bruydt waren vp die cruyspoorte twee roerende Leuwen, deene hadde in sinen claeu eenen standaert metter wapene van Vlaendren ende dandere metter wapene van Vlaendren ende dandere metter wapene van Brugghe, Ende vp die voorseyde twee torren vander poorte waren vele selueren trompetten ende claroenen, die alle sloughen met blijden voyse, als die voorseyde bruydt der poorte ghenaecte. Ende die huysen vander poorte totten houe toe waren al behanghen met tapijtserye, ende andersins. |
|