Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe die hertoghe Phelips Raedt hielt met sinen heeren.

[fol. C.xiiij.r]

ITem die hertoghe Phelips dede vergaderen sinen Raedt omme aduijs ende maniere hier vp te hebbene, in welcken raedt was ghesloten ende gheconcludeirt, dat die hertoghe van Bourgoengien soude seynden aen die van Lutcenburch sinen messagiers, hem lieden beuelende dat si souden doen der hertoghinne, alle die obediencie die si haer schuldich waren van doene. Ende waert dat sy dat niet en daden, dat haer die Hertoghe van Bourgoengien soude helpen met al sijnder macht, dat si haer obedieren souden, van welcken beuele die van Lutcenburch niet en wilden houden, noch obedieren in gheender manieren, hoe wel dat sy nochtan dicwille daer toe vermaent waren, ende dat dicwil aen hem lieden begheert hadde gheweist, maer omme hem lieden te onderhoudene so versaghen sy hem van volcke van wapenen, binnen harer stede, te wetene den hertoghe van Zassen, die hem seide ende ouerdrouch alle dinc vanden hertoghe van Lutcenburch. Ende hi sandt daer een van sinen maechschepe van Lutcenburch, die Graue van Lijngy, met.vij.of.viij^c.lieden van wapenen huyt den duytschen landen ende die leyden si in garnisoene, in de Stede van Lutcenburch, ende in die stede van Tronvyle, ende andere steden ende fortressen daer omtrent gheleghen, die hem lieden waren gheionstich. Ende dit volck van orloghen daer ghecommen sijnde, sy begonsten te loopene ende te doene groote orloghe vp die steden die ghebleuen waren, in die obediencie van mer Vrauwe die Hertoghinne, ende bi dyen so wort dat Landt in groten gheschille ende diuisye, by den welcken sy quamen in grooter tribulacien. Ende die Hertoghe van Bourgoengien hoorende ende vernemende alle daghe haer lieder quaet propoost, wille, ende voortstel, sloet in sinen raedt vp hem lieden sulcke een orloghe te doene dat sijs gheware souden worden. Ende screef om dese sake ende cause letteren aenden Graue van Valkenburch, Aen den Ioncheere van Salmarye, Aen Heyndrick van tour, ende aen vele andere Edele vanden lande van Lutcenburch, ende andere Maertsen daer omtrent gheleghen, van welcken die meeste menichte hielt dye partye vander voorseyde Hertoghinne, ende wilde hem lieden voughen ter hulpe ende ionste van huer omme te makene ende te houdene oorloghe vp alle die ghene, die haer contrarie waren ende inobedient. Ende seyde dat hi daer cortelinghe ende sonder nyet seere lanc te toeuen soude daer seynden van sinen lieden van orloghen. Ende daer naer dat hi selue commen soude in properen persoone, omme te vercrijghene dat voornomde Heertoochschip, Ende dat hy soude verdrijuen dat ander volck van wapenen, dat binnen der stadt van Lutcenburch was. Ende in anderen plaetsen daer omtrent gheleghen, in welcke begheerte vanden seluen Hertoghe van Bourgoengien sy waren seere wel ghepaeyt, ende oock te vreden daer toe te verstane ende te obedierenne. Ende naer dat si hadden ontseyt die van Lutcenburch, ende begonsten te loopene ende oorloghe vp hem lieden te doene, soe sandt binnen deser tijt die Hertoghe van Borgoengien aen den Graue van Stampes in pycaerdyen, ende ontboot hem dat hi terstont soude doen vergaderen eene groote quantiteyt van volcke van wapenen, ende dat te bringhen bi hem int lant van Borgoengien, twelck hi oock also dede. Ende als alle sijne wapeninghe was ghereedt hi dede hem lieden trecken te sinte Quintens in Vermandoys, ende hy track ooc selue met den lijue daer mede in eyghen persoone. Ende met hem waren dese naeruolghende persoonen.

Eerst, Walram te moereul.

De heer Symondelalain

Guy de royen

De heere van neusvyle

De here van humerees

Galbaen quareyt

De here van sauences

De heere Anthonius wissoen

Ian de applaincourt.

Ende veel meer andere Rudders ende ioncheeren, ende waren al te samen omtrent. twalef hondert mannen wel voorsien van wapenen. Ende hy track van sinte Quitins te Lahon, omme te passerene seer by den Graefschepe van Rethiers, maer als hy nv ghecommen was met allen sinen volcke omtrent Montagoeul, ende Sy-

[fol. C.xiiij.v]

sonne, so was hem geseyt dat eeneghe capyteynen vanden coninc van Vranckerijcke waren ghelogiert te Montagoeul, ende inde plecke van sysonne, die welcke cortelinge geweist hadden int landt van Retheirs, daer si grote schade ghedaen hadden, omme het welcke de graue van Stampes was seere gram vp hem lieden ende qualic ghepayt, want een lettel tijts hier te voren die selue capiteynen hadden gheroeft in Bourgoengien. Ende si hadden belooft dat si niet meer en souden commen logieren in eenich landt toe behoorende den Hertoghe van Bourgoengien in eeneger manieren

¶ Item die graue van Stampes ontboodt hem lieden ende beual dat si souden trecken buten sine weghen, ende dat hi selue wilde commen logieren te Montagoul, twelcke si niet en wilden doen, omme twelcke tusschen hem lieden rees een groot gheschil. Ende was gheordonneirt bi den graue van Stampes ende bi die van sinen Rade dat men vp hem lieden loopen soude, ende het was also gedaen. Ende die capiteynen vanden coninc waren seere berooft van haren goede, als van peerden ende ander goeden, iuweelen, ende lettel so warer daer versleghen of ghequetst, maer daer waren vele van sconincx lieden gheuanghen, ende daer naer waren si weder laten gaen. Ende hem lieden was weder ghegheuen som van haren goede, ende by speciale so was daer weder ghegheuen het goedt vanden vppersten capiteyn, ende sy vertrocken also haestelic alssi consten, omme het welcke dye coninc ende sinen sone die Daulphijn en waren niet weltevreden, om datmen vp hemlieden aldus verstoort gheweist hadde, ende ofghesedt in sijn landt. Ende omme dat de Daulphijn hadde gedaen doen te Digioen eeneghe saken van grieue, omme die van Diepen te sercoursene, ende te helpene daer of dat hier naer sal sijn verclaerst, niet te min die saken bleuen also gedaen. Ende die graue van stampes vertrac tot vp dye maertse van Bourgoengien, ende traken vpdie maertse van Langheers, ende montsonghen. Ende binnen deser tijdt die Graue van Stampes, ende die meeste deel van die met hem waren trocken bi den hertoghe Phelips te dygion in Bourgoengien, daer si wel waren ontfaen, Ende si waren daer so lange, dat hem die Hertoghe van Bourgoengien hem ghereede, omme te treckene met machte van volcke vp het Hertoochschip van Lutcenburch.