Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe doe eenen Pieter reynault was seer vertasserende die landen vanden Hertoghe van Borgoengien, ende vanden Graue van Stampes, ende meer andere.

¶ Dat.xxx.viij.Capittel.

ITem dese Pieter reynault hilt sijn woonste ende vertrec vp tcasteel te Nulluy, het welcke es vp.ij.mijlen naer die stede van beauuays, die welcke plecke hi hadde ghedaen repareren ende verstercken. Ende hi hadde wel bi hem.ij^c.vechtender mannen alle stercke zackemans seere vygoreus, ende vroom, met den welcken hi liep dicwils in diueersche plecken, ende al tghene dat si consten ghecrijghen binnen den casteele ofte palen van dien, also wel vp sconincx lant als elders, dat voerden si ende brochtent binnen haerlieder casteel ende fortresse. Ende specialicken soe haddy ghelopen, ende liep van daghe te daghe vppe tlant ende heerlichede vanden Hertoghe van Borgoengien, ende die graue van Stampes, ende van meer andere van deser partyen. Ende oock mede so passeirde hi het watere het welcke heet die riuiere vander somme, streckende tot in dye maertse van Artoys, twelck was wel.xij.of.xvi.mijlen van huerlieder stercte ende fortresse. Ende si quamen ooc in die Casselrye van Perone, mondydier, ende Roye, daer sy ghecreghen goede prisoenies, dye welcke si stelden vp groot rensoen, inder ghelijcke ende maniere, al oft hadde gheweest binnen der tijt dat oorloghe was, vanden welcken mijns heren volc was seere verlast.

¶ Item dit was den Hertoghe van Borgoengien daghelicx gheclaecht, omme twelcke hi seere tonureden was. Ende omme dese cause, so sandt die voorseyde Hertoghe tot den coninck, ende ooc omme meer andere questien die hem van noode waren. Ende die ghedeputeirde vanden Hertoghe van Borgoengien verhaelden den coninc dye destructie die tlant hadde, ende baden den coninck dat hem gheliefde daer inne te doene prouisye, vp twelcke die coninc antwoorde alsoe hy tanderen tijden ghedaen hadde, vp ghelijcke questie, dattet hem seer leedt was, ende dat hijer nyet wel in te vreden was. Ende hy seyde dat die Hertoghe van Borgoengien of worpen soude haerlieder stercten ende fortressen, ende waer dat hijse vonde in sijne heerlichede, dat hijse te nieuten dade by sinen volcke. Ende die coninc seyde hy soude ghebieden sijne capiteynen vander maertsen daer ontrent, dat si hem gheene bystandichede noch ook sercours en souden doen in eenegher manieren, vp alle tghene dat si van hem hilden. Vp twelcke antwoorde die Hertoghe van Borgoengien dat hy weltevreden was, ende dochte dat hi also gheringhe als hi mochte soude pijnen te makene tractiet metten capiteynen vanden Inghelschen vp dye maertse van Normandyen, dat si hem souden versekeren van gheen orloghe te doene vp sijn volc, ter cause dat sijne lieden mochten gaen ende te nyeute doen ende verdrijuen den voorseyde Pieter Reynault ende die sijne. Ende als die Hertoghe van Bourgoengien ghenouch was versekert van beede den sijden, dat si hem noch sijnen volcke gheen belet doen en souden in dye sake voren verhaelt, dye welcke Hertoge als doe was in sijn lant van Borgoengien. Es te wetene dat die Graue

[fol. C.xiij.r]

van Sympol ende van Stampes hadden tgouuernement van sinen lande, ende Martche van Pycaerdyen dat dese Grauen souden vergaderen also vele volcx als si consten ende mochten, dat ontboodt hi hemlieden. Ende dat syse souden leeden voor tcasteel van Nuylluy. In welcke saken deden die voorseyde Grauen sulcke neersticheyt, dat si in corte stont vergadert hadden, wel.xij^c.vechtende mannen, Als Rudders, Ioncheeren, ende ander vrome mannen van wapenen, Te wetene, Eerst Walrane de moreul. Ian de appelecourt Guy de Roye      Charles de rutsefoort Ian de angiers Monseyde colaert de maelgij De here van sauences. De here van neufvyle Symon de la lain Hughe de Nulluy

¶ Ende dye vergaderinghe van desen edelen mannen ende heeren, was ghedaen binnen der stede van Amyens, tot welcker plaetse was gheladen vp waghene groote menichte van artijlerye ende ghereeschepe van oorloghe. Ende si vertrocken van daer in schoonder ordonanchie te Bauuays, daer si seer eerlicke ende blijdelick ontfaen waren. Ende het ghemeene volc van wapenen dat ghinc logieren inde Dorpen daer omtrent. Ende van daer so track die voorseyde graue voor tcasteel van Nulluy, Ende dede logieren tot voor die poorte vanden voorseyde casteele, die si ontwee braken, ende was nochtan seere sterck ende tprincipale beschut van haren fortresse. Ende specialic vanden nederhoue, twelck sy daer te voren seere vermaect ende versterckt hadden, met groten eeckenboomen, ende andere houten. Ende die van binnen begonsten hem seere te weerene, ende vromelic met bussen ende met alderhande gheweere. Ende in die scharmutsinghe bleef daer doot mijn here Mahieu van humeres. Ende die lieden vanden Graue van Stampes hadden ghelaten den meestendeel van hueren peerden inde stede van Beauuays, welcke stede van beauuays ende ooc Amyens sonden alle daghe alderhande vytaelie in de voorseyde siedge. Ende gheduerde die selue siedge naer dat die voorseyde engienen daer waren gheleydt een langhe tijdt. Ende si daden grote schade vp die fortresse vanden voorseyde nederhoue voren verhaelt.

[Int iaer.xiiij^c.ende.xliij.]

¶ Item daer naer so wasser vanden ghenen die de siedge hilden een seer groot ende hardt assault ghedaen vp tvoorseyde casteel, in welc assault waren gedaen van beede den sijden seere vaeliante stucken, in welcken assault die here van Sauences behaelde grote eere ende prijs Niet te min die van binnen weerden hem seere crachtelicke ende vromelicke, Ende want die belegghers, siende dat si dat casteel niet ghecrijghen en mochten sonder grote schade ende verlies van haren volcke, daer omme so deysden si want daer bleuer doot, vanden ghenen dye tcasteel bestoormden in dat assault wel.viii.of.x.mannen ende eeneghe ghequetst vanden verweerers. Ende daer naer de verweerers siende dat si tvoorseyde casteel niet lange en souden moghen houden, ende dat si gheen hope en hadden, sercours te verwachten, so maecten si tractiet metten ghecommitteirden vanden graue van stampes. By deser condicie, dat si souden moghen vertrecken ende dragen al haer lieder goet met hemlieden, ende midts dien, so souden si leueren ouer tvoorseyde casteel ende fortresse, waer in datmen tvier stac, ende dedet al gheheel te nieute. Ende die graue van stampes ende sijn volc vertrocken in die goede weke van danen dat si ghecommen waren. Ende dese.G.hadder mede gheweist int voorseyde siedge. Ende om dat tvoorseyde casteel gheraseert was, die scamele lantlieden daer ontrent gheseten waren seer verblijt, want si alle den dach gerooft ende ghepilgiert hadden gheweist vanden ghenen die in tvoorseyde casteel laghen, ende nyet dan grote foortse ende quaet en daden. Dit gheschiede int iaer.xiiij^c.ende.xliij.