Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

¶ Hoe Kaerle dye Hertoge van Orlyens weder keerde huyt Vranckerijcke, byden Hertoghe Phelips van Borgoengien, die als doe was binnen der stede van Hesdijn.

¶ Dat.xxxvij.Capittel

[Den iare van.M.iiij^c.ende.xlij]

ITem als die Hertoghe van Orlyens was wederkeerende huyt Vranckerijcke byden Hertoghe Phelips van Bourgoengien. Ende als die Hertoghe vernam sijnder comste, hi track yegens hem, ende si toochden malcanderen groot ionste ende vrientschap, ende trocken binnen der stede van Hesdijn, daer die voornoemde Hertoghe was.viij.daghen lanck. Ende dye machtighe Hertoghe van Orlyens hilt daer die feeste van

[fol. C.xij.v]

allen heleghen. Ende binnen deser tijt soe hilden dese twee Hertoghen groten raet, vp tghene dat si voor handen hadden, ende sloten te gadere dat si cortelinghe weder souden vergaderen te samen, in die stede van Nyueers, met meer andere grote princhen ende heren van die croone van Vranckerijcke. Ende die dachuaert ghepasseirt sijnde, die Hertoghe track van daer duer Simpol, ende quam in die stede van Atrecht, daer hi eerlick ende chierlic was ontfanghen ende ghefeesteirt van den heeren vander stede, ende was daer beschoncken met schoonen rijckelicken ghiften. Ende als die Hertoghe van Orliens van danen schiet, so track hi naer die stede van Parijs. Dyt gheschiede binnen den iare van.M.iiij^c.ende.xlij.

¶ Item in tbeghintsel vanden seluen iare die Keysere van Oostrijcke quam te Besanchen met schoonen gheselschepe van groten edelen princhen ende heren, tot welcker plecke so trac tot hem die hertoghe van Borgoengien, met vele edelen, ende met schoonen state omme die Keyser te visenteirene.