IN dien tijden dye Hertoghinne voorseyde Ysabeele dochter vanden Coninc van Poortingale track te Aloen, met schoonen state, ende groten gheselschepe van Rudders ende van ioncheren also wel als vanden Raedtslieden, ende oock ghestoffiert van Vrauwen ende Ioncvrauwen. Ende omme dat si ten besten niet en was ghesondt, so was si gheuoert in eenen osbare, Ende daer quamen yeghens huer ghereden huyter stede van Aloen wel een mijle weichs, Te weten Arthus de Bretaengne, Graue van Ritsemont, Conincxstable van Vranckerijcke, die welcke hadde ghetraut die sustere vanden Hertoghe van Bourgoengien, die welcke Graue beweichde haer tot inde Stede, Ende ooc mede tot by den coninck, diese minlick ontfinck ende wellecomdese seere hueschelicken. Ende so dede oock sijn sone die Daulphijn, ende vele andere edele heeren. Ende naer dese ontfanghinghe, so was sy beweicht inde Abdye van sinte Bertins, daer si inne was ghelogiert. Ende si was te meneghen stonden bi den coninck, omme hem te biddene eeneghe pointen, daer mede dat si was ghelast van den Hertoghe Phelips haren heere ende man, Also wel vp den pays generale vanden twee Conincrijcken, Te wetene Vranckerijcke ende Inghelandt, Ende ooc vanden sticke vanden Hertoghe van Orlyens. Ende oock omme die fortresse van Montagoul, toe behoorende mijn Heere van Camersijs, twelcke noch in handen hilt Guyliame de Hynau, ende ook andere lieden vanden volcke van mijn Heere van Lutcenburch ende seyden, si en wildent niet leueren dat ghenen dyet aen hem lieden hadden versocht van Sconincx weghe, het en ware by orloue vanden Hertoghe van Bourgoengien, omme welck wedersegghen so waren vergadert een groot gheselschap van Sconincx lieden voorseyde omme vp dye conditie, daer vooren te legghene siedge, also was den Raedt vp hope datmen soude vercrijghen, datmen by dien mochte tractieren van drye questyen voor tvertrecken vander voorseyde Hertoghine van Bourgoengien.
¶ Item in sghelijcx so ghinck by den coninc te Aloen Iehanne van Bethune Graefnede van Lijngy, ende Vycontesse van meaulx, die welcke Coninck was weltevreden van harer comste, ende ontfijnckse seer danckelick ende blijdelic. Ende dese Graefnede verliefuede aen den Coninck, al haer heerlichede dye si was houdende vanden coninc.Ende maecte tractyet met den Coninc, ende sine commissaresen van also vele alst haer aengaen mochte van haer goedt meubel sijnde, twelc haer ghebleuen was van haren man, Het welcke men seyde dat gheconfijskiert was, omme dat hi was verscheeden van leuenden lijue ter doot, als contrarie sijnde den Coninck van Vranckerijcke, omme twelcke sy betaelde een grote somme van penninghen. Ende midts dien so bleef sy in payse, ende daer of hadde si goede brieuen vanden Coninck, ende dit vulcommen sijnde, so vertrac si in huere heerlicheden.
Auteursrechtvrij
