Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[¶ Hoe twee Cardenalen ghesonden waren van den Paeus Tatrecht, om den paeys te maken]

¶ Hoe twee Cardenalen ghesonden waren van den Paeus Tatrecht, om den paeys te maken tusschen den coninck van Vranckerijcke ende van Inghelant, ende den Dolphijn ende Hertoghe Phelips, om die doot van Hertoghe Ian.

[Int iaer.xiiij^c.ende.xxxv en van sint Iacobs dach in Hoeymaent tot den eersten dach in Laumaent]

Int iaer.xiiij^c.ende.xxxv.ontrent sinte Marien magdalenen dach waren ghesonden.ij.Cardenalen vanden paeus Eugenius, ende ooc van den consilie generale datmen hilt te Basele, deen cardenael was den cardenael van cypers sconincx broedere van Cypers, dandere was een chaertrues, ende was gheheeten den cardenael van sinte Cruys. Dese quamen Tatrecht in Artois, ende waren ghesonden om den paeys te makene tusschen die.ij.coninghen, te wetene vanden coninc van vranckerijcke ende den coninc van Inghelant, ende tusschen den Dolphijn ende den hertoghe phelips om die doot vanden hertoghe Ian die die Dolphijn dede doot slaen verradelijck te Montrien vp die cheyne. Daer quamen vele notable Ambassaduers vanden Co-

[fol. lxxxiiij.r]

ninc van Vranckerijcke, ende vanden coninc van Ingelant. Item die hertoghe Phelips was daer selue in proberen persone, daer was lange ghetracteirt, ende dat segghen van den cardenalen was huyten monde vanden paeus, ende huyten sluyten vanden generalen consilie te Basele, dat die.ij.conincrijcken Vranckerijcke ende Inghelant, elc lant moeste eenen.coninc.hebben alsoot plach te sine. Die Inghelschen dat horende si en wildens niet ontfaen ouer danckelic, ende si seyden dat dye.coninc.Heyndric van Inghelant warachtich.coninc.van Vranckerijcke was, midts dat hi te Parijs ghecroont was. Voort dat Seggheschip gheseyt ende gheeynt sijnde, soe tracteirden die voornoemde cardenalen tusschen den.Coninc.van Vranckerijcke ende den hertoge phelips van borgoengien, van dat die.coninc.hadde ghedaen verradelicken doot slaen den Hertoge Ian int iaer xiiij^c.ende.xix.Ende Chaerle die.coninc.van Vranckerijcke ende die hertoge Phelips van Borgoengien gauent beede ouere ter eeren van gode haer lieder questie ende gheschil inden handen vanden.ij.cardenalen huyten name vander heleger kercken, ende inden ghenen dye si daer toe te rade nemen souden met hemlieden. Ende dat seggen was dat ouer dye emende vander mesdaet vander doot vanden hertoge Ian, dat die.coninc.soude gheuen den hertoge phelips Amiens, vermandoys, ende dat oude Westvlaendren, te wetene Aryen, aerden metten sloten ende casteelen daer toe behoorende, ende dye regentsye van Parijs. Ende aldus ende vp dese condicien so was die paeys ghemaect tusschen den.coninc.K.van Vranckerijcke ende den hertoghe Phelips van Borgoengien. Ende als vanden sticke vanden.ij.coningen, so en was tseggherscip vanden cardenalen, midtsgaders dat si haer segghescip niet al voleynt en hadden, dat in dien den coninc van Inghelant den paeys aenghinghe, ende daer inne consenteirde, hy soude hebben ende behouden tgraefschip van guyenne, ende al Normandyen, ende tgraefschip van Guyse, ende dese landen soude hi houden in manscepe ende te leene vanden coninc van vranckerijcke, ende hi soude ghehouden sijn den coninc van Vranckerijcke daer of manschip te doene naar den ouden costumen ende rechten. Ende sy gauen den ambassaduers vanden coninck van Ingelant respijt om hemlieden daer vp te beradene, van sint Iacobs dach in Hoeymaent tot den eersten dach in Laumaent. Ende als den nyendach commen was, ende dat si antwoorde van dien souden gheuen, so vonden die Inghelschen eenen omme slach vanden paeyse, omme die tontgane segghende, dat die hertoghe van Borgoengien ne gheen paeys schuldich en was te makene metten Dolphijn van Vranckerijcke sonder tconsent vanden Inghelschen, want hy haddet beloeft ende ghesworen den coninc van Ingelant, ende midts dat hi sijne belofte nyet en hilt, soe was hy ontseyt vanden coninc van Inghelant. Ende die hertoge van Clocestre ende van Ioorc sonden brieuen aen den Hertoghe van Ghelre, aen die van Hollant, aen den bisschop van kuelen, ende van Luydeke, ende aenden keyser om bystandicheyt, ende dat om te cranckene den hertoghe van Borgoengien, als een meyneedich ende versworen man (also si seyden) Ende die Hertoge van Borgoengien ghecreech die Messagiers met haren brieuen dye si droughen. Ende aldus waren si ghescheeden die daer vergadert waren om den paeys te maken. etc.

[Int selue iaer]

¶ Item die Inghelschen roofden inden vasten daer naer int selue iaer die vlote metten wijne commende te Vlaendren waert, die welcke vlote die castilianen weder namen den Inghelschen. Dat ghedaen sijnde, metsgaders dat dye Hertoghe Phelips dese boden metten brieuen ghecreghen hadde, so waren die Inghelschen ghescoffiert, ende en vernamen gheen sercours, noch antwoorde van dien.

¶ Item ontrent dye vastenauent quamen binnen der stede van Vtrecht vele ruters lieden van wapenen al in pelgryms abijten, ende si waren onder wel ghewapent ende voorsien, ende waren van sgrauen van Nyueers lieden, ende sy meenden den heere Walraue van Nyueers den bisschop van Vutrecht ghemaect byden concilie vander stadt van Vtrecht, ouer te gheuene, ende den postulaet Rodulf van diephout doot te slane. Die van Vtrecht wordens gheware vp den Vastenauent, maer dye ruters vloden meest huyter stadt maer daer wasser een deel ghecreghen binnen Vtrecht, ende die waren des maendaechs inden vastenauent alle onthooft.