Dits die Excellente Chronijcke van Vlaenderen

Beghinnende van Liederick Buck den eersten forestier tot den laetsten, die door haar Vrome feyten, namaels Grauen van Vlaenderen gemaect Worden [...]

[¶ Van den goeden Graue Kaerle]

¶ Van den goeden Graue Kaerle, sint Cauwerts sone, tsconincx van Denemercke, den.xiiij.Graue, dye welcke eene halue Canesye stichte tonseyde vrauwen binnen Brugge, ende wardt vp eenen vrydach binnen sinte Donaes kercke te Brugghe vermoort.

¶ Dat.xix.Capittel.

[fol. xviij.r]

DIe heleghe ende gherechteghe Kaerle sint cauwerts sone tsconincx van Denemercke was die xiiij.Graue in Vlaendren. Als hi in Vlaendren ontfanghen was, hi ghinck sint Omaers, ende ontboodt sine edele ende sine leenhouders, ende hy hielt aldaer een costelic hof van groter chierlicheyt. Ende midts dat hi verhoorde dat te auennes int casteel vele roouers waren,Ende Hughe de auennes dye Casteleyn was, ende hilt tcasteel van Saintpol. Men roofde alle dye lieden die daer leden, ende men vermoordese. Ende daer omme beual dye goede Graue Kaerle, dat sine Edele ende sine Leenhouders hem volghen souden te Saintpol, omme dat Casteel, ende andre Roofhuysen te destrueirne, gelijc Auennes ende meer andre. Ende hy deidtse alle breken ende destrueren, ende hi iusticierde die Roouers ende Moordenaers die seer sterck waren, ende hi suuerde Tlandt so datmer vry mochte gaen ende keeren, dyt verhorende die coninc van Vranckerijcke, dat sijn neue Boudin Apkin ghestoruen was, ende dat Kaerle sijn ander sweer weer eruelic hoir was, ende landtsheere van Vlaendren. Ende dat hi tlandt ende die weghen ghesuuert hadde vanden Roouers, so ontboodt hy Kaerle dat hy te Parijs quame, ende hem manschap dade van den Graefschepe van vlaendren Dit ghedaen ende blijdelic van den coninc Lodewijc ontfanghen sijnde, quam weder te Vlaenderwaert, ende daer commende vandt Clementie Boudin Apkins moedre met eenen grooten heyrcrachte van pycarden, die welcke wilde selue Vlaendren huer leuen lanc regieren, ende meende Kaerlen te veriaeghene. Ende oorloghede met vrienden ende met maghen yeghens kaerle, ende omme dat die van Oudenaerde, huer nyet en wilden ontfanghen, als Landtsvrauwe, so ghecreech si bi crachte Oudenaerde, ende roouede dye Stede ende slouch die lieden doot, ende dede die Stede verbarnen, hare hulpers waren, die Graue van mons ende van Saintpol, die Graue van Hesdijn, die Here van Couchy, van Arien, van Beunen, ende van Condeyt, ende vele andere, die Oudenaerde hielpen verbarnen ende beroouen, ende veil quaets daden in Vlaendren. Dye goede Kaerle met sijnder wijsheyt ende vromicheyt, hi ginc te Hesdijn, te Beunen, te Couchy, te sint Venants hi selgierde alle die fortressen, ende brac die mueren, en dede die vesten vullen, maer hy en stichte gheenen brandt. Aldus verwan hy sine vianden, die sommege waren gheuangen, ende sommeghe doot geslegen sommege die vloden, die sommeghe begheerden pays, ende Karels vrientscepe. Ende die pays begheerden, die verghaft hi hemlieden gheerne om die minne gods. Kaerle aldus sine vyanden verwonnen hebbende, gouuerneerde hi bedt dan.vi.iaer vlaendren in groten payse, hi was seere deuoot gode, den aermen lyberael ende milde, ende van elcken bemint, den kercken begiftelic, ende den quaden stuer ende fel in sinen tijden die Nonnen die in sinte Benifacius kercke woenden te Brugghe dat nv onser vrouwen kercke heet, hi dede die Nonnen translateren ten houe in hoedeghem Ende hy dede onse vrauwen kercken meersen, ende stelder inne eene halue canesye, in dat.vij.iaer sijnder heerscappie, so wasser eenen groten dieren tijt al Vranckerijck duere, ende ook in vlaendren so dat vele armer lieden van hongher storuen waer om dat die goede graue maecte eenen poorter van Brugge gheheeten Tammaert sijn aelmoesenier, beuelende hem dat hi alle dage soude gheuen elcken aermen mensche een broodt het gheuiel dat Kaerle hadde te doene Typre vp eenen vrydach ende voor de noen wasser ghedeelt in dye presencie van den graue.K.bi tammaerdt sinen aelmoesenier bet dan.viij^c.brooden. Item die graue.K.beual Tammaerde dat hy alle vrydage gheuen soude.xiij.aerme lieden elc een cleet, ende een hemde, ende een paer scoens. Item alle vrydage vastede hi te biere ende te brode, ten ware dattet eenege sonderlinghe geest gheweest hadde. Item alle vrydage, so drouch hi eene haren scilicie naest sinen lijue, ende hi sliep al gecleedt ende hi ghinc alle vrydaghe wullen, ende baervoet ter kerckenwaert, ende hi en schiet vander kercken nyet ten was hooge noene. Ende hi ghinc alle vrydaghe lanc gecleedt, om datmen sine bloote voeten niet sien en soude Ende hi hadde dan aen eenen haesac gegort met selueren penningen, die hy den armen gaf, die yegen hem om aelmoesen quaemen, Het gheuiel dat om den dieren tijt vanden coorne die in Vlaendre was, ende ook al vranckerijcke duere, so dat die oosterlingen broch

[fol. xviij.v]

ten vele schepen met coorne, dit vernemende mer Lambrecht van straten ende Bertolf sijn broedre, die proost was van sinte Donaes. Ende Bosschaert van straten, si cochten al dat coorne om seere cleenen prijs yeghen die oosterlingen. Ende si cochtent ooc te Coukelare, ende te Lisseweghe, ende allen die thienden bye den Cloostre van sinte Pieters te Ghendt, sinte Bertins, sinte Omaers, en sinte Winnocxberghe toe behoorden. Ende si leydent al in hueren schueren, ende vp hueren graenders. Ende vercochten huer cooren seer diere nae haren wille, so dat die aerme niet ghestaet en waren om cooren te coopene. Tvolck starf van benoedicheden ende van honghere, dat gheroup vanden ghemeenen ende oock vanden aermen quam in die ooren vanden goedertieren Kaerle, dat dese Bertolf van der straten, die proost van sinte Donaes, ende Lambrecht vander straten sone, dat si hadden vele schueren ende graenders vul corens, maer si wildender alte vele ghelts of hebben. Ende daer omme beual die Graue Tammaerde, dat hi ondersoucken soude, of dye proosten mer Lambrecht sijn broeder so vele corens hadden als dye mare liep, ende oft also ware, dit ondersocht sijnde, men vandt datsi vele corens hadden. Ende daer omme beual die Graue Kaerle dat die proost ende Lambrecht sijn broeder eygens hem soude commen spreken. Die proost ende mer lambrecht commende, dye Graue sprac, segghende tes groot iammere dat ghi heer proost, so vele coorens hebt, ende so grooten coop. Ende ghi laet vlaendren bederuen van honghere, doe swoer dye proost, hi en hadde niet coorens ghenoech vi.weken om hem ende sijn ghesinne te voeden metsgaders sine cannonicken. Ende heer lambrecht van straten sprac ooc die graue Kaerle toe seggende van ghelijcken dat hy nauw coorens ghenouch en hadde, om een maendt bi te leuene. Die goede graue Kaerle sprac datmen soude voorsien omme den proost om die cannonicken ende huer lieder ghesinde. Ende der ghelijcke ooc omme heere lambrecht ende ooc sijn ghesinde om een half iaer lanc gheduerende, ende daer mede soude elc ghepaeyt wesen. Doe beual die graue Kaerle datmen alle die schamele lieden, dat coorne soude gheuen, ten minsten prijse. Ende die gheen ghelt en hadden, men soudt hemlieden gheuen om gods wille, want daer was corens ghenouch omme te sustineirne Brugghe twee iaer lanc gheduerende. Alle menschen quamen om coorne, om daer by te leuene, dye sommeghe omme een iaere, die sommeghe om een half iaer. Ende men onfinckere een ouerdadich ghelt van den voornoemden coorne datter vercocht was, nochtan so bleeffer corens ghenouch omme die Canesye mede te voedene, ende mer Lambrecht met sinen huysghesinne een iaer lanc gheduerende. Ende die goede Graue Kaerle, siende dat groot goedt datmen vanden coorne ontfanghen hadde, hi ontboodt den Proost Bertolf, ende sijn broedere heer Lambrecht van Straten, ende begonste hemleeden schoffierichlick toe te sprekene, ende seyde hemlieden dat sy onghenadighe wouckenaers waren, ende nyet weerdich en waren officieren te sine, ende dat si waren als onnutte vermalendijde ende verwaten lieden, ende weerdich hunt allen goeden gheselschepe versteken te sine, ende huut allen goeden steden, als valsche lueghenaers, sueraers, ende onprofijtelicke allen goeden kersten menschen. Niet te min, ghi seyt dat ghi nauwelijc coren hadt om hu ende huwe Cannonicken.vi.weken by te leuene, ende ghi Lambrecht om een maent. Weet dat ic u corens ghenouch ghelaten hebbe, bet dan om een iaer bi te leuene, ende daer is vele ghelts of ontfanghen. Ende die Graue seyde, tammaerde dat hy hemlieden dat ghelt soude ouer gheuen. Ende die proost sprac sinen broeder onweerdelic toe, seggende ende hem beuelende dat hijt nyet en name. Doen beual dye Graue Kaerle datmen al tgheldt soude deelen den aermen om gods wille. Bosschaert van Straten Lambrechts sone dyt verhoorende vanden Proost sinen oom dat die Graue hem so schimpelick toe ghesproken hadde, ende oock sinen vadre midts dat tammaerdt gewroucht hadde vanden coorne. Daer omme so seyde Bosscaert totten Proost sinen oom. Mijn vader heift in Oorscamp een huuthof ende een groot bogaert, streckende aen Tammaerdts eestre. Ic sal die palen verstellen vanden landt ghesceede ende hem ontrecken dat landtsceedt van sinen eestre, ende stellen die palen tot voor

[fol. xix.r]

die poorte van sinen eestre, ende also sullen wi hem ofwinnen sijn eestre, ende aldus so moghen wi ons wat wreken ouer hem. Ende aldus biden rade vanden proost, Bertolf ende van Lambrecht Bosscaerts vadre, soe verstelde Bosscaert die palen, want het gheuiel in die keerse tijt ontrent sint ians dach midsomers, dat mer Lambrechts van straten mistlieden, die poorte van Tammaerdts eestre opene vonden, ende byden beuele van Bosscaert, so pluckeden si of alle die rijpe keersen Ende die pachter van Tammaerts eestre waerts gheware, ende hi wilde die keersen nemen, ende beletten datmense niet wech dragen en soude, waer bi dat dye pachtre wiert met vuysten gesleghen, ende onder die voeten ghetorden. Ende Bosscaert met sijns vaders knapen droughen die keersen tsint Donaes in die proostye, seggende den proost die geuaernesse Die pachtre claechdet den graue K.ende Tammaerde sinen meistre die schade van sine fruyte, ende sinen quetsuere Ende men ontboot Lambrecht, ende sinen sone Bosscaert, maer hy en wilde totten graue nyet commen, maer des ander daechs dede mer Lambrecht ende sijn sone bosscaert Tammaerdts poorte vellen, ende omme worpen ter nedre. Het gebuerde noch in die prume tijt dat Bosscaerts van straten knapen quamen in Tammaerdts eestre, ende si schudden alle die prumen of die si daer vonden. Het wordt Tammaerde gheclaecht, maer hi ghedoochdet want hi moeste metten graue kaerle varen in pycaerdye, ende daer omme belaste hi sommeghe van sinen lieden, die wijle dat hi metten graue huyt soude sijn, dat si dat casteelkin van sinen eestre wel bewaren souden. Ende waert dat si meer quamen int eestere, omme smeerpeeren, ofte om eenich ander fruyt te nemenne, dat mense met crachte wederstaen soude. Binnender tijt dat Hertoge Kaerle in pycaerdyen was, daer hy ooc here of was.Ende Tammaert sijn aelmoesenier was ooc met hem, so gebuerdet vp alder dach in pietmaent, Lambrecht ende sijn sone Bosscaert beuelen al huerlieder knapen, dat si alle dat fruyt of doen souden, dat in Tammaerts eestre was. Die knapen in teester commende, den pachter quam te Brugghe, ende claeghder Tammaerdts oom, want Tammaert metten prinche in Pycardyen was, ende daer omme Tammaerts oom sende.xx.vrome ghesellen ten eestre waert, ende daer wordemen vechtende, so dat bosschaerts knapen alle ghewondt waren, ende seere gequetst. Deen hadde den voet of, ende dander die vuyst of ghesleghen, die derde den aerm bi naest of, so dat men Bosschaerts knapen moeste te Brugghe voeren. Als dyt vernam mer Lambrecht van straten ende Bosscaert sijn sone, si ghinghen ten eestre waert met groter macht, ende dede alle die boomen vellen, ende tcasteelkin vanden gronde vpwaert omme werpen. Als daer dat gedaen was, si keerden weder omme in Brugghe, ende quamen in Tammaerdts huys, ende sloughen doot Tammaerdts oom, ende Tammaerdts dochtre, dye beurucht was, dye was so ghewont dat die vrucht bedarf, ende si starf corts daer naer. Omtrent midwinter, die graue Kaerle quam te Brugghe, ende Tammaerdt was seere bedruct om sijn oom ende om sijne dochtre, dat si so iammerlicke gedoot waren, ende omme sine vaderlicke erue, die so gheselgiert was. Het was den graue geclaecht, ende alle dingen waren ondersocht, van beeden partyen, ende si bleuens ten segghene vanden graue Kaerle, die welcke seyde, so dat Bosscaert bleef in dye schade, ende in die schande, want hy moest vprechten die schade vanden frute, ende vanden boomen, oft die weerde daer ouer betalen. Ende hy moest doen maken, die poorte, die huysen ende tcasteelkin, beter dant te voren was. Ende eenen somme van penninghe gheuen alle iare, tot dat die boomen also groot waren, als si waren, eer si twist namen yeghen malcandre. Ende Bosscaert soude seggen dat hem leedt ware, dat hy dye palen valschelijck hadde doen verstellen, ende van alle sticken die daer te voren gheschiet waren. Ende oock beual hy hem alle die schade binnen eenen iare vp te rechtene. Het gheuiel op den.xiij.dach dattet wel gheurosen was, ende daer vp wat ghesneeut, vp die maeltijt als dye Graue Kaerle te Brugghe was, ende soude gaen eten vander noene, doen quam den abt van sinte Bertins moede in ghegaen, ende al beclact voor den Graue Kaerle, ende seyde die benedixie. Die Graue seere verwondert, vraechde hem wat hi te Brugge sonderlincx te doen hadde, aldus commende int therte

[fol. xix.v]

vanden wijntre, ende sulcke pijnen ende moeyenesse hem seluen dede, haddi in sijn clooster gheweest, hi en hadde so beslapt niet gheweest, noch so moede, ende ghy en sijt hier niet gecommen sonder cost, twaer beter hadt ghy bi huwen monicken ghebleuen, ende dese hoochtijt niet verswymt, ende hadt huwe monicken met desen coste gherecreeirt. Doen sprac dien abt, gheduchte here ende prinche wilt weten dat Bosscaert van straten, heift ons beloeft ouer drie iaer onse thienden te bewarene van Couckelare, ende van Lisseweghe, ende bi Houdenburch, ende wi en connen van hem noch van sinen vader niet ghecrijghen. Item van ten ghiften van huwen weerden neue, die weerdighe edele prinche Boudin apkin van salegher memorie, wi en ontfanghen niet. Die goede Kaerle worde seere verstoort ende seere gram, ende hem verwonderde seere, maer hi temperde si gramscap om dye weerdichede vander feeste, ende van sinen edelen, dye te sinen houe waren, maer hi en mochte niet eten van groter gramschap. Maer hi ontboot den proost Bertolf, als dat hi niet laten en soude, hi en quame ter maeltijt vanden Graue Ende dye proost commende, maer seere spade. Die Graue vermaecte diueersche officien ter seluer maeltijt, ende gafse den ghenen dye ter maeltijt waren. Ende die prinche beual den abt, dat hy soude segghen voor den proost, ende voor hem allen dye daer waren, waer omme dat hi so inden fellen winter te Brugge ghecommen was. Hy beclaechde hem aldaer ouer Lambrecht van straten, ende van Bosscaert sinen sone, dat si hem drie iaren die thienden onthouden hadden, sonder betalen. Doen sprac die goede Kaerle. O cancellier ende heer proost wat segdy hier toe, ende wat raedijs. Die proost wordt seere beschaemt, om die schandelicke saken van sinen broedre mer Lambrecht, ende sinen neue Bosscaert, daer omme dat hi aldaer ontboden was. Ende men hilt dese princhelicken feeste in Tsprinchen hof met vele heeren en schiltknapen, dye ter feesten ghenoodt waren, maer mer Lambrecht van straten, noch gheen van siden kindren, noch nyement van al sinen gheslachte en wasser ghenoodt, noch geroupen ter voorseyde feeste, noch vanden officien diere vermaect waren, men sprac niet aen den proost. Niet yeghen staende, dat hi nochtans cancellier was als noch, recht ofmen sijns niet gheachten hadde. Dit merckende die proost, datmen sijns niet en achtede, trac huyter princhelicker sale seere verstoort. Die graue dye sprack. Hoort Bertolf, ic beuele hu dat ghi den abt ende sijnder abdyen doet vernoughen, binnen viij.daghen, so dat ick nyet meer clachte en hoore, op die verboerte van huwen seghele vanden Cancellier, ende ooc vp die verbuerte van al den goeden van huwen broeder, ende van Bosscaert, gheconfijskiert ende tmijnder tafele gheleyt te sijne, als verbeurt goet. Den Proost wech gaende, hi seydet sinen broeder Lambrecht. Ende si droughen ouer een, dat sy souden te sinte Maertens messe typre gaen, ende ontbieden alle huerlieden vrienden ende maghen, omme bystandicheyt, want si meenden den goeden graue Kaerle te doodene, aengesien dat hi noch vader, noch moeder, suster noch broeder, oom noch neue hier in vlaendren en hadde, noch eeneghen maech, dye sine doot wreken soude. Aldus meende si sterck ghenouch te wesene. Item vp sinte Vincentius dach, Bertolf die proost, ende mer Lambrecht van straten, ende alle sine kijndren, ende met vele rechtsweers, mer Guyot van steenvoorden, ende vele andere vergadert zijnde, so was ouer een ghedreghen, als die graue Kaerle soude te Brugge sijn, midts dat hy des vrydaechs nuchtens, bi costumen tijlicke ghinck tsinte Donaes, vp die vaute bouen den choor, in sine deuocie. Ende hy ghinc dan met eenen langhen keerle totter eerden, om te bedeckene sine voeten, want hi tsvrydaechs altijt baerbeens, ende baeruoets ghinc, hoorende daer eene messe of twee. Ende plach daer vp die vaulte altijt te blijuen totter hoogher noene, ende dat alden dienst ghedaen was. Ende aldus die ordonancie ende raet, die Bertolf den Proost ende sine vrienden Typre, tsinte Maertins hilden, was dat Bosscaert vander Straten, ende sine broeders ende daer toe vele vrome ionghe ghesellen van huerlieder gheslachte, als Willen, Wyntrij, Werrin ende Ysaac, dese souden alle te Brugghe liggen, in huerlieder sheren ooms huys.s.Donaes, in die proostie, ende svrydaechs nuchtens souden si wesen vp die vaute, bouen den choor, om te bespien wanneer die graue.K.

[fol. xx.r]

soude commen sinte Donaes. Ende bouen der vauten sijnde, si soudene doodt slaen. Des dijscendaechs vp den vastenauent, die welcke quam in tlaetste van sporcle. Doe quam die goede graue.K.te Brugghe, ende tsvrindaechs daer naer, twelcke was den derden dach van Maerte. Die goede graue Kaerle quam alleene baeruoets gaende van sinen houe tot sinte Donaes snuchtens seere tijlicke met eenen langen keerle seer deuotilic, ende hi hadde gegort sinen haessac met selueren penninghen, die hi by costumen om gode plach te gheuene, ende op dyen voorseyde vrydach tijlicke ghinc hi bouen der vaulte sine bedinghe lesende, also hy ghewoone was. Ende als sijn capellaen soude misse lesen, so quam daer een aerm wijf biddende om aelmoesene totten voorseyde Graue, ende hi sine rechter hant stekende in sinen haessac, meenende der aermer vrauwe om Gods wille te gheuene. Doe quam bosscaert vander strate met sinen broeders ende met sinen magen, ende slougen den graue sine rechter hant af, daer hi der vrauwe een aelmoesen mede ghegeuene soude hebben. Ende bouen dien so cloofde hy hem sijn hooft in tween ende vermoordene al daer hi knielde in sijn deuocie. Ende die arme vrauwe ontfangen hebbende den penninc, so liep si wter kercken, roepende wachaermen, men vermoort daer bouen den Graue Kaerle. Ende die wethouders vander stede worden die sake vernemende, ende also dat si inden burch quamen, so slouchmen se doot, ende ooc den goede Tammaerdt, die aelmoesenier was vanden graue Kaerle. Ende Bosscaerdt ende alle sine ghesellen namen Tammaerdts goet, ende daer naer ghinghen si in tsprinchen hof, en slougen al Tsgrauen gesinde doot, ende namen al des princhen yuweelen, ende brochtense in die Proostye. Die graue lach in die kercke van sinte donaes tot tsondaechs naer der noene. Ende sommege personen namen bedectelicke cleederkins, ende nettense int bloedt vanden Graue, ende ghenasen vander cortsen ende van meer andere siecten, mer niemant en dorste bewaren, want Bosscaerdt ende sine mede gesellen beletten dattene nyement wech draghen noch begrauen en mochte. Dese mare van dese onredelicker moort, liep al Vlaender duere, ende Brabant Henegauwe, Artoys, ende over alle diueersche landen, ende hoe si waren in groter menichte die dit fayt gedaen hadden, huyten welcken groot volck quam te Brugghe waerts. Ende daer omme Lambrecht van straten, Bosscaert ende Willen sijn sonen, Inghelram van eessene Wijntry, Ysaack, ende alle huere medepleghers, si vloden inden burch, ende hilden den steen, tghyselhuys sinte Donaes ende die looue, ende si voorsaghen hemlieden van prouanchen genouch omme.iij^c.gesellen een iaer lanc bi te leuene. Doen quam dye abt van sinte pieters, mer Seruaes van praet, mer Boudin van Ghendt, mer Hellin van Bouchoute, mer Diederick van Dixmude, mer Rijckquaert vander Beerst, ende sine broeders quamen met machte te Brugge, ende deden dat lichaem van den prinche ter eerden doen te sinte Christoffels kercke, ende beleyden mer Lambrecht van Straten ende sine medeghesellen bedt dat een maent lanc. Willem van Looburch graue van Ypre verhorende die doodt van sinen neue den goeden graue.K.quam te Brugge, ondersouckende tfayt, ende dat occusoen, waarom dat hi vermoort was. Hi dede senden om sine mannen ende alle die hem wel wilden, ende dede belegghen den burch, ende dye wel waken ende bewaren, so dat mer Lambrecht ende sijn gheselschap hem nyet huyt stelen en souden. Ende Willem van Loo ghinc te Ghendt, Typre, te Cassele, vernieuwende die officiers, ende horende die rekeninghen. Item hi quam weder te Brugge, vermakende die wet, want die scepenen waren meestendeel doot gesleghen van Bosscaert van straten. Ende men hilt al Vlaender duere Willem van Loo ouer Graue, ende alle gheboden ende commandementen dede men huyt sijnder name. Item sdaechs naer dat die voorseyde graue aldus vermoordt was, dat was Tsaterdaechs, vele menschen namen haer cleedren of doucxkins, ende nettense in sijn bloedt, iae trocken haer huyt sinen baerde, ende huyt sinen hoofde, twelck si hilden al ouer precieuse Relijcquien, ende verdreuen ooc alle quale ende onghesonde. Item in sinte Andries cloostre buten Brugge weunde een mensche, die.xxi.iaren crepel geweest hadde, ende den abt van.s.andries die had dene.viij.iaren gehouden, gespijst ende gecleet om gods wille Ende die crepel voer vp eenen waghen te Brugge tot vp die marct, ende van daer so croop hy te sinte donaes. Die wijle

[fol. xx.v]

dat dat dode lichame noch lach inden choor s.Donaes. Ende dat aensichte vanden prinche was bedect met sinen hoede. Dese crepele nam den hoen in sijn hant, ende terstont so wordt hi rechte gaende, of hi noyt crepel geweest en hadde. Ende deis crepels name was Roegekin die toolenare. Ende tvolck dit siende, wilden den lichame vanden graue wech gedregen hebben. Doen quam Bosscaert van straten met sinen sweerde, ende sinen knapen seggende. Laet sien, wie is hi of wie sijnse, diene wreken willen, of diene begrauen sal, ende iougen alle tvolc huten choore, ende huter kercken. Een poorter van Brugghe nam des grauen hoet bedectelicken, ende bewaerdene seer weerdichlik menich iaer, ende als yement hadde hooftsweere, of den reume, oft die cortsen, si quamen tot dien poortre, ende stelden des grauen.K.hoet vp haerlieder hooft, ende terstont genasen si. Nota dat alle die te rune ende te rade waren vander doot vanden goeden.K.dye storuen quade doot eerlange daer naer.hy was.viij.iaer G. van vlaendren, hi was verslegen anno.M.c.ende.xxvij.