Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend❧ Op de wise van den lustelijcken mey/ maer men moet dat leste veers dobbel singen1.
LAet ons te samen
Nu alle verbliden
Want tot onser vramen
Tot desen tiden
Gheboren is dliefste kint daer dach op daecht
Het heeft god drieuuldich also behaecht
Lof/ danck/ ghemeene doet
Den kindeken cleene soet
Ende eert Maria sijn moeder ende maecht
2.
Thoochste beuel
Der godheyt oueruloedich
Ontsinck seer snel
Maria ootmoedich
Ende baerde Iesum haer kint onuersaecht.
Het heeft God. &c.
3.
Wt svaders macht
Is ons ghegheuen
Op den kerstnacht
Ons steruen/ ons leuen
Dies thelsche conroot gheheel is nu gheplaecht
Het heeft God drieuuldich alsoe. &c.
4.
Int eertsche beuanck
Hier int dal beneden
Als mensche cranck
Voer ons heeft gheleden
Veel nijts/ daer na vanden ioden beclaecht
Het heeft God driuuldich alsoe behaecht. &c. ||
5.
Aent cruycen hout
Om onse sonden
Dit kindeken stout
Ontfinck vijf wonden
Ende heeft om onse schulden die doot ghewaecht
Theeft God driuuldich also. &c.
6.
Den bitteren doot
Om ons ghestoruen
Die gramschap groot
Sijns vaders verworuen
Ende heeft het sondich werc van onsgheuaecht
Het heeft God driuuldich so behaecht. &c.
7.
Maria princersse
Van gratien moeder
Weest ons troostersse
Voer ons behoeder
Int eynde/ voer v kint ons vane draecht
Dat onse siele van hem mach sijn behaecht
Lof/ danc/ ghemeene doet
Den kindeken cleene soet
Ende eert Maria sijn moeder ende maecht.
|
|