Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend❧ Dese leysen gaet op die wise Wel lieue manneken ghi sijt een hanneken. ||❧ Als Ioris hellen dese leysen stelde
Ter eeren Maria/ was qualijck bi ghelde.
1.
HOort aen ons vrolijcheyt
Waer bi nu vruecht gheschiet
Alle shemels ondersaten
Wij waren int verdriet
Hadde Gods sone niet
Ghecomen tonser baten.
| |
[pagina 291]
| |
Mer die heere heeft aenghesien
Die grote ootmoet vol trouwen
Van sijnder deernen/ In wien
Veel gratien souden gheschien
Bouen alle ander vrouwen
In wien Veel gratien sou. &c.
2.
Een suyuer maghet net
Wonende tot Nazareth
Maria was haren name
Al vander ioetscher wet
Maria reyn ende onbesmet
Van der erf sonden blame
O Maria wel ghebenedijt
Moeste ghi van gode wesen
Die v dus heeft/ Beurijdt
Want ghi sijn woonstede sijt
Noyt reynder wtghelesen
Beurijdt Want ghi sijn woon. &c.
3.
O alder soetste iuecht
Bouen dijn suyuer duecht
Noch waerdy so ootmoedich
Dies hem tot onser vruecht
In v heel heeft verhuecht
Die godheyt oueruloedich.
Want na Esayas prophecie
So menich iaer voerscreuen
Waert ghi bevrucht/ Marie
Met shemels melodie
En sijt reyn maghet bleuen
Marie Met shemels melo. &c.
4.
Op een den coutsten nacht
Baerde ghi uwe dracht
Al sonder wee oft pine
God heeft v dies bewacht
Want het was wel in sijn macht
Also gheboren te sine.
Recht so die clare sonne schijnt
Doert glas sonder bescaden
So baerde Maria/ Haer kijnt
Van smette onghepijnt
Al bider Gods ghenaden
Haer kijnt Van smette on. &c.
5.
Also scriftuere seyt
Voer ons dat si beuecht
Tserpent der helscher soorte
Bi dien so yst wel recht
Dat men haer lof toe lecht
Bi Ezechiels poorte.
Wtuercoren als de sonne claer
Ende schoonder dan die mane
Sijt ghi Maria/ Voerwaer ||
Gedeons vlies troostbaer
Draecht onser alder vane
Voerwaer Gedeons vlie. &c.
6.
Lof schoon roose playsant
In Iericho gheplant
Lof spieghel sonder smette
Lof Dauids herpe triumphant
Ons troost ende ons onderstant
Lof suyuer fiolette
O lelie wit vol ruecken soet
Onder die doornen schone
Sijt eewich van mi/ ghegroet
Al doer dijn suyuer bloet
Dwelc God wert in perfone
Ghegroet Al doer dijn suy. &c.
7.
Princelike maecht
Die God dus hebt behaecht
Doet doch voer ons die boete
Al onsen druck veriaecht
Oerloge heeft ons gheplaecht
Hout ons pays ende vrede
| |
[pagina 292]
| |
Ende na dit leuen gheeft ons spel
Daer dengelen vruecht bedriuen
Wij wilden met herten/ snel
Bi v lieden wesen wel
Maria wilt bi ons bliuen.
|