Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend❧ Dese leysen gaet op die wise van Den lustelijcken mey Christus playsant. Soect vore onder die liedekensℂ Mathijs compere doer Gods moeder
Maecte dese leysen als sheyligen gheests broeder
1.
GHegroet so sijt Maria
Moeder ghebenedijt
Gratia plena ||
Der godheyt sijt beurijdt
Nu ende in alder tijt
Maect ons van sonden quijt
V ende v kint hier ghedaelt beneden
Dancken wij menichfout
| |
[pagina 290]
| |
Want hi heeft sijn ionghe teeder leden
Voer ons ghesticht aent cruycen hout.
2.
Ghi hebt des vaders woort
Veruult doer v ootmoet
Ende doer v accoort
Ist gheworden vleesch ende bloet
Gheloeft sijt moeder soet
Ghi baersde ons behoet
V ende v kint hier ghedaelt. &c.
3.
Die godheyt hoochste die wijn
Hebt ghi gheopenbaert
Christus het hemelsche schijn
Als mensche ghehantiert
Reyn moeder ghemaniert
Die themelsche rijck verciert
Was gheboren hier int dal beneden
Wi dancken menichfout. &c.
4.
Die herderkens ontsprongen
Op den couden kerstnacht
Mits dat die engelen songen
Gloria svaders macht
In excelsis nu lach
Deo die salighe dracht
Was gheboren hier int dal. &c.
5.
Doer des engels sanc aenhoren
Verwondert seer in dien
Daer Cristus lach gheboren
So liepen sijt aensien
Elck met gheboghen knien
Sijnde voi melodien
Ghingen si tkindeken aenbeden
Ende dancken menichfout
6.
Als sijt warachtich vonden
Dat die engel hadde verclaert
Hebben sij in corten stonden
Dit al gheopenbaert
Ende liepen ter cudden waert.
Neerstelijck seer onueruaert
Haer scaepkens vonden sij in vreden
Ende dancten hem menichfout. &c.
7.
Louen wij nu te samen
Tkint ende sijn moeder Marie
So dat ons tonser vramen
Een goet nyeu iaer gheschie
Hoochste seignorie
Iaecht van ons die helsche prie
Al ons dleuen hier begeeft beneden
Bidden wi menichfout
Die hebt v ionghe teeder leden
Voer ons ghestrect aent cruycen hout.
|
|