Een devoot ende profitelyck boecxken

N^o. CCXXXVII.aant.

1.
Het was een maget wtuercoren
Daer Iesus af woude sijn gheboren
Dies ben ick vro
O o o benedicamus domino.
2.
Heer Iesus sprac tot Gabriel schoon
Hi seyde vaert neder wten troon
Dies ben ick vro.
O o o be.

[p. 275]

 

⁺

 

3.

 

Al totter stede van nazareth

 

Dair woont een maget onbesmet

 

Dies ben ick vro.

 

O o o &c.

 

4.

 

Groetse mi metten name mijn

 

Ende segt dat ic haer kint wil sijn

 

Dies bin ic vro

 

O o o benedica.

 

5.

 

Die engel was een bode goet

 

Hi quam neder metter spoet

 

Dies ben ick vro.

 

O o o. &c

 

6.

 

Te Nazareth al in die stede

 

Daer si lach in haer ghebede

 

Dies ben ick vro.

 

O o o benedic.

 

7.

 

Hi seyde/ God groet v suuer maghet

 

Ghi sijt die Gode seer wel behaghet

 

Dies ben ick vro. &c.

 

8.

 

Hi wil van v gheboren sijn

 

Iesus Christus die meester mijn

 

Dies ben ick vro.

 

O o o benedi.

 

9.

 

Als Maria dat verstoet

 

Wert si veruaert in haren moet

 

Dies ben ick vro

 

O o o benedic.

 

10.

 

Ende si sprac hoe mocht ick hem bekinnen

 

Want ic noyt man en begheerde om minnen

 

Dies ben ick vro. &c.

 

11.

 

Die heylighe gheest sal in v comen

 

Ghelijc den dau || valt op die bloemen

 

Des ben ick vro. &c.

 

12.

 

Maria weset onuersaecht

 

Het is die Gods sone dyen ghi draecht

 

Dies ben ic vro. &c.

 

13.

 

Iesus heeft v wtuercoren

 

Hi wil verlossen dat was verloren

 

Dies ben ick vro. &c.

 

14.

 

Van allen seere ben ick ghenesen

 

De deerne Gods wil ick wesen

 

Dies ben ick

 

15.

 

Maria viel neder op haer knien

 

Den wille Gods moet in mi gheschien

 

Dies ben ick vro

 

O o o benedicamus domino.

+ Fo. C.xxiij.^v-Fo. C.xxiiij.^r