Een devoot ende profitelyck boecxken

[p. 268]

⁺

+ Fo. C.xx.^v

N^o. CCXXXIII.aant.

1.
Kinder nu louet die maghet Marie
Si heeft veruult die prophecie
Si heeft eenen soon/ si is maget Marie
Dat wonder en geschiede ons nye
2.
Maria is een sterre schone
Die ons verlicht al aen den throne
Wie haer aenbedet hy heeft te lone
Van Iesus kerst Marien sone
3.
Maria is een dagheraet
Die voer der midder nacht op staet
Wie haer aenbidt hi heeft aflaet
Van alle sonderlijcke misdaet
4.
Maria is een triniteyt
Si is moeder der ontfermherticheyt
Sy is moeder ende reyne maghet
Die onsen vader wel behaget.
5.
Maria is een roose sonder doren
Die God tot sijnder moeder hadde wtuercoren
Eer Iesus Christus was gheboren
So was dese werelt al verloren
6.
Maria is een volle vloet
Daer God aen nam vleesch ende bloet
Dat sal ons allen wesen goet
Nu dienen wij om deewich goet
7.
Heer Ioseph viel neder op sine knien
Hy en conde dat wonder niet aen ghesien
Daert kint al in die cribbe lach
Hi wist wel dat Gods sone was
8.
Die enghelen songhen sanctus/ sanctus
Hier is die heylighe gheest int huys
Gheboren van een ionge maecht
Die alder werelt wel behaecht
9.
Sijt willecoem heer iongelinc
Die ons van bouen is ghesint
Dat is Iesus Marien kint
Ende alder engelen coninck.