Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise1.
ONse heere die sijn rijck liet
Al hier beneden dat hi quam
Hi daelde in die maget Marie
Menschelike forme hi aen nam
Dat dede sijn hooghe minne
Wij waren ghewont tot dat hi quam
Nu minnen wij seere/ den hoochsten heere
Die heeft ons grote gracie ghedaen.
2.
Als Cristus wilde sijn geboren
Maecte hijt sinen engelen cont
Om dat sijt souden openbaren
Die hadden eenen ootmoedigen gront
Ter stont wert dat Herodes gheware
Hi sprac een woert datmen verstont
Nu minnen wi seere den hoochsten heer
Hi heeft ons grote. &c.
3.
Als Christus quam tot sinen iaren
Wilde hi in die woestine gaen
Hi wilde ons allen exempel leeren
Hoe wi becoringhe souden wederstaen
Die vyant hief hem in dat hooghe
Nochtans moeste hi van dare gaen.
Nu minnen wi seere. &c.
4.
Als Cristus quam tot sinen tiden
Wilde hi tot sijn apostolen gaen
Hi wilde hen allen exempel gheuen
Hoe si die waerheyt souden verstaen
Hi seyde hen sijn secreten
Die apostolen waren seer qualijc ghedaen
Nu minnen wij. &c.
5.
Alst Christus al volbrengen woude
Ende tot sinen vader wilde gaen
Doen liet hi hem gheesselen ende bespouwen
Ende daer na aent cruyce slaen
Dit leedt hi van hooger minnen
Hi riep so luyde/ mijn heer mijn God
Nu minnen wi seere den hoochsten heere
Ende laet ons leuen na sijn ghebot.
|
|