Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 206]
| |
ℂ Die wise van Die lelien ende roosen. || 1.
DIe valc is neder comen
Al wt dat hooge lant
Hi vlooch dat hof al omme
Tot eender duyuen tam
Die edel menscheyt hi aen haer nam.
Doer der propheten woerden
Maect hi ons dat bekant.
2.
Hy vlooch in desen woude
Wel drie en dertich iaer
Ende al om onse sonden
Soe leedt hi pine swaer.
Ende was ter doot toe gehoorsaem
So dat hi van groter minnen
Des cruycen boom op clam
3.
Aent cruce droeuich van sinnen
So hinck die ionghelinc
Bernende vol van minnen
Want hi den doot ontsinck
Maer wie met sonden is beuaen
Hi en derf hem niet versaghen
Het is al voer hem voldaen.
4.
Laet ons hem alle louen
Die ons dus heeft verlost
Den heere van hier bouen
Het heeft hem sijn bloet ghecost
Laet ons hem dienen trouwelijc
So moghen wij bi hem comen
Al in dat eewich rijck.
| |
[pagina 207]
| |
5.
Wie Iesus minne wil dragen
Moet scouwen der werelt iolijt
Ende dienen hem sonder traghen
Die wile dat hi heeft tijt
Ende houden sijn herte van sonden claer
So moechdy hier na comen
Al inder enghelen scaer
6.
O siele heft op v ooghen
Aensiet ws vaders hof
Ende wilt v daer toe pooghen
Ende scheyt der werelt of
Want so ons die scrifture bediet ||
Die vruecht die daer wesen sal
En mach men begripen niet.
|