Een devoot ende profitelyck boecxken

[p. 201]

⁺

+ Fo. xcv.^v-Fo. xcvi.^rN i

N^o. CLXVIII.aant.

ℂ Op die selue wise/ oft op Het voer een man ten houte

1.
HEer Iesus voer ter sielen
En die goedertieren weert
Daer vant hi sijn gheminde
Van rouwe seer verteert.
2.
O dochter lieue dochter
Wat is v gheschiet
Ende ick om uwen wille
Mi seluen cruycen liet.
3.
O vader ic mach wel weenen
Ende beyde mijn handen slaen
Maer dat ic minen edelen tijt
Verloren hebbe saen.
4.
O dochter lieue dochter
Laet v dat wesen leet
Alle mijn grote ghenadicheyt
Die sal v sijn bereet
5.
Coemt van libaen mijn duue
Coemt hier ghi wort ghecroont
Wilt ghi v tot mi voeghen
Ghi wort van mi gheloont
6.
Die coninc van Ierusalem
Is sijnder bruyt ghetrouwe
Si heeft den paeys ghemaect || met hem
Die waerde suyuer vrouwe
7.
Hi sant een bode van groter virtuyt
Tot eenre schoonder bloemen
Hi bracht der maget een groote saluyt
Dat was onser alder vromen.
8.
Die bode daelde neder onuersaecht
Al totter waerder reyne
Hi seyde God groet v suyuer maecht
Vol gratien sijt ghi alleyne
9.
Die maghet wert swaer in haer ghedochte
Ende si en sprac niet een enckel woert
Ende si peysde wat dit bedieden mochte.
Die groete en hadde si noyt ghehoort.
10.
Die engel sprac der maget toe
En ontsiet v niet reyn edel vat
Het is des heeren wil alsoe.
Ende ghi sult worden sconincx stat
11.
Die opperste heer sal in v dalen
O weerde suuer lelie fijn
Hi salt ransoen alleen betalen
Met sijn groote bitter pijn
12.
Die maecht antwoerde ootmoedelijck
Si was bescaemt in haren sin
Dat mi ontbiet die coninck rijck
Daer consentere ic blidelijc in.
13.
Die engel doe van dare schiet
Die weerde maecht bleef sonder vare
Haer herteken dat blees sonder verdriet
Tuycht ons scrifture openbare.