Een devoot ende profitelyck boecxken

N^o. CLIII.

ℂ Op die selue wise

1.
OCh maechdeken wildy gheestelijc wesen
So moet ghi v onder eenen anderen gheuen
Wat si v ghebieden tot alle stonden
Daer in so moety sijn te vreden
2.
O heere dat can ic seer qualijck gheliden.
Dat mi een ander sal onderwisen
Ic wil mijns selfs regeerder sijn
Dats mijnder herten so grote pijn
3.
Lief kint ghi en moecht der pauwen niet slachten
Ghi en moecht v veerkens niet so hooch op rechten
Ghi moet v oogen beneden staen
Suldy die valsce stricken ontgaen
4.
O here tis mi een salige leer
Want dat striden valt mi soe suer
Het sal my costen mijn vleesch mijn bloet
Want die stormen sijn also groot

[p. 186]

 

⁺

 

5.

 

Lief kint ghi en dorft so seer niet droeuen

 

Heer Ihesus sal sijn vrienden so proeuen

 

Hi salse proeuen ghelijc dat gout

 

Want ghi noch sijt van minnen cout ||

 

6.

 

O here sult ghi v vrienden so proeuen

 

Des mach ic mi wel seer bedroeuen

 

Want seyt mi yemant een toornich woort

 

Ick ben so haest op hem ghestoort

 

7.

 

Lief kint ghi en dorft so seere niet clagen

 

Ick sal v doer alle v stormen draghen

 

Ende ick en sals v niet af gaen

 

Ende dan sal ic v ridder slaen

 

8.

 

O here sult ghi mi ridder slaen

 

So is mijn trueren al ghedaen

 

So en wil ic toch nu niet meer sorghen

 

Als ick v heb tot eenen borghe

 

9.

 

Ick wil metter tortelduyue gaen rusten

 

In Iesus wonden mi mach ghelusten

 

Ende bliuen daer desen winter wt

 

Want Iesus mijn brudegom is so rijc.

 

10.

 

Te somer wil ick weder opwaerts vlieghen

 

Tot Iesum minen soeten lieue.

 

Ende sien wat hi mi heeft bereet

 

Hi heeft mi dic so seer ghenoot.

 

11.

 

Hi salse nemen al metter hant

 

Hi salse leyden aen den dans

 

Daer salsi hooren die enghelen singhen

 

Ende bliuen daer als een keyserinne

 

12.

 

Men sal segghen mijn lieue vriendinne

 

Die ick met goeder herten beminne.

 

Nu siet die bruyloft is v bereet

 

Nu slaet om een hemels cleet

+ Fo. lxxxviij.^r-Fo. lxxxix.^r