Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 177]
| |
ℂ Op de selue wise/ oft op Met vruechden willen wi singhen/ oft op Het viel eenen coelen dau1.
WIe sal mi toch helpen clagen
Al minen verloren tijt
Consciencie die wil altijt knagen
Si en gheeft mi gheen respijt
In gheen dingen ben ic verblijt
Die hier beneden sijn
Ick bid v ghenade heere
Die sculden sijn al mijn
2.
Had ic mi seluen wel bedocht
Ten waer mi nu gheen noot
Die heere hadde gaerne in my ghewrocht
Sijn gracie is alsoe groot
Nu vindic mi van duechden bloot
Hoe soude ick blide ghesijn
Ick bid v ghenade. &cet.
3.
Had ic van minen iongen tijt
Altijt na die duecht ghestaen
so waren nature en gheest verblijt
Nu ben ick met druck beuaen ||
Dat heb ic mi seluen al ghedaen
Hoe soude ick blide ghesijn
Ick bid v ghenade. &ce.
4.
Ic wil voort gaen besteden
In duechden minen corten tijt
Ende soecken troost aen Gode
Eer mi die doot verbijt
Si en sal mi gheuen gheen respijt
Hoe soude ick blide ghesijn
Ick bid v ghenade. &ce.
5.
Gods goetheyt is al gemeene
Ick wil in hopen staen
Const ic mijn sonden beweenen
Hi soude mi in gratien ontfaen
Al had ic noch so veel misdaen
Dan soude ick blide sijn
Ick bid v ghenade. &c.
6.
Had ic die gracie ons heeren
So waer mijn siele gheuoet
Si soude mi dwingen leeren
Minen ongestoruen moet.
Const icken worpen onder die voet.
So soude ick blide sijn
Ick bid v ghenade. &c.
7.
Nu wil ick goelijck liden
Pine/ druck/ en verdriet/
Conde ic daer in verbliden
So waer mi wel gheschiet
Si en quamen daer sonder liden niet
Die daer bouen sijn
Ick bid v ghenade. &c.
8.
Ick ben in een valleye
God is mijn toeuerlaet
Ic soude mi gaerne vermeyen
Daer alle dinc in rusten staet
Niet eer en wort mijn siel versaet
Dan sal ick blide sijn
Ick bid v ghenade heere
Die sculden sijn al mijn
9.
Mocht mijnder siele ghebueren
So waer si wt alder noot
Duysent iaer schijnt niet een vre
Die bliscap is daer also groot
| |
[pagina 178]
| |
Sij scouwen daer die waerheyt bloot
Sij mogen wel blide sijn
Ick bid v ghenade heere
Die schulden sijn al mijn.
|