Een devoot ende profitelyck boecxken

N^o. CXXXVIII.

ℂ Op die selue wise

1.
IN mi seluen so wil ic gaen
Ende Iesum leeren minnen
Hi is die schoonste bouen al
Hi staet in mine sinnen
2.
So wie Iesus minne draecht
Die mach wel vrolijck wesen
Hi is een roose wide ontdaen
Voer alle die hem aen cleuen
3.
Hi is een roode roose root
Ende minnelijc int aenscouwen
Hi is mijn lief mijn minnekijn
Hem wil ick sijn ghetrouwe.
4.
Hi is die schoonste die ic weet
Waer vintmen sijns ghelijcke
Willen wi ons herte tot hem keeren
Hi sal ons maken rijcke.
5.
Hi is een heere bouen al
Van hemel ende van eerden
Willen wi ons seluen wte gaen
Hi sal ons wel gheweerden
6.
O Iesu alder liefste heer
Mocht ick ter minnen comen
Ende mijn nature steruen leeren
Het soude mi vele vromen.
7.
Sy moet nochtans verwonnen zijn
Al sout haer grote pine sijn
Sal si comen in bliscap groot
Daer die Cherubinnen sijn
8.
Iesus is een fonteyne
Wel hem die daer wt drincken
Hi is so suyuer ende so reyne
Een edel wijngaert rancke
9.
Hier om so wil ic blidelijc liden
Ten wort hier mer een corte tijt
Als ic come bi mijn soete lief
Daer sal ic driuen groot iolijt
10.
Die bliscap is daer so groot
Die eewelijck ghedueren sal ||
Hier om laet ons de werelt versmaen
Ende God minnen bouen al
11.
Die dit lieken heest ghemaect
God wilse in duechden sparen
Ende brengense na dese corte tijt
Al in der enghelen scharen