Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise1.
MIne herte dwingt my om singhen
Om te veriaghen druck
Ick sie die werelt dwinghen
Elcken tot ongheluck
Hi heeft seer wel gheuaren
Die haers vry is ontlast
Want nye in hondert iaren
En wast so scherp om plaren
Eer men daer doer ghepast
2.
Diet al wil ouerdincken
Waer is nu pays oft vrede
Waer sietmen discordie mincken
Waer is eendrachtichede
Dat is al met een vergheten
| |
[pagina 162]
| |
Niemant daer op en let
Dies derf ick mi vermeten
Sij sullent noch wel weten
Die daer meest me sijn besinet
3.
Die werelt is vol treken
Desgelijcx en was noyt ghesien
Drie dobbel in haer spreken
Haer net en can niemant vlien
Schoon spreken sonder meenen
En lachen voert aenschijn
Maer wildy mi verbeenen
Om ghelt oft pant te leenen
So en sal ic thuys niet sijn.
4.
Ick ben tot uwen besten
Op dat v niet en belieft ||
Van eersten totten lesten
Wort ghi van mi gherieft
Dit wort alle daghe vertoghen
Van vele sonder waen
Maer sulck vint hem bedroghen
Want this noch al gheploghen
Ende tblijft oock onghedaen
5.
Och werlt wat soudy maken
Oft ghi wat dueren mocht
Ghi soudet al missaken
Wat ghi oyt voren brocht.
Ghi en cont niet dan schoon liegen
Al toondy mi samblant
Het coemt al op een bedrieghen
Wel hem die v laet vlieghen.
Ende houde hem aen Gods hant
6.
Twas wilen eer van trouwen
Wat deen totten anderen sprack
Men wil daer nu niet af houwen.
Het sijn spillen inden sack
Hi moet wel sijn in dolen
Die hem op menschen verlaet
Ende gaet ter werelt scholen
Die worpt hem onder die solen
Ende blijft van Gode verhaet
7.
Conde ic mi haers ontwenden
So waer mi lief gheschiet
Los waer ic van allenden
Gheboet waer mijn verdriet
Maer lacy si heeft mi tonder
Ende soe in haer bedwanck
Ic en weet gheen raet bisonder
Aldus en yst gheen wonder.
Al singhe ick droeuen sanck
8.
O Ihesu lieue heere
Dats groot verschil van di
Als ick mi tot v keere
Veel eer bistu bi mi
Dus bid ick v doer v minne
Daer ghi mi mede bemint
Ontfunct also mijn sinne
Dat icxse doch verwinne
So en sorghe ic niet een twint.
9.
Ick wil gaen leeren steruen
Eer mi den tijt begheeft
So mach ick duecht verweruen.
Ende comen daermen leeft
Al in die engelsche chooren
God gheefs mi goeden spoet
Daer en can men niet ghehooren
Daer af mocht comen thoren
Ick en ghere gheen lieuer goet
|
|