Een devoot ende profitelyck boecxken

N^o. CVIII.

ℂ Op die selue wise

1.
COmt van libaen mijn duue
Coemt hier ghi wort ghecroent
Wilt ghi v tot mi voeghen
Ghi wort van mi gheloont ||
Die vruechden sijn also soete
Gaet uwer lusten wte
Terdt de nature onder die voete
2.
De siele die wert droncken
Al in des heeren woert
In minnen wert si ontsoncken
Si scheen van vruechden doot
Si daelde neder in sinen schoot.
Maer aldat si begherende was
Dat was van hem ghehoort.
3.
Si dranck wt sijnder herten
Den alder puersten wijn
Sijn goddelike smerten
Was haer een medicijn
Si wert verlost wt alder pijn
Als si aensach met vruechden
Den schilt der minnen fijn
4.
Hi nam wt grooter minnen
Ons crancke menscheyt aen
Dat heeft si wel connen versinnen
Ende si yst al af ghegaen
Ghenoechte/ solaes/ eere/ en vruecht
Ende si heeft haer verlaten
Al in des heeren duecht.
5.
Haer cleederen waren besprongen
Met sinen bloede root
In minnen worden si versmolten
Ende si sprack sonder woort
Die engelen houden met haer accoort
Sij louen den oppersten vader
Al vander bliscap groot
6.
Met vruechden is dit liedeken ghedicht
Met eender blider herten
Ick bidde Gode eenparelijck
Dat hi ghedencke der smerten
Die hi van minnen heeft ontfaen.
Wt sijn grote milde duecht
So heeft hijt al ghedaen