Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise.1.
Laet ons met vruechden singen
Ende blidelijck spelen gaen
Ende alle vreemde dinghen
Van ons doen vlyen saen
Van Iesus eest vermaen
Hi is ons vrient/ onse heere
Ons lief/ ende al ons eere
Om hem yst al ghedaen
2.
Twee vroukens vander stede
Bethanien/ wel bekant
Rijck/ edel/ ende goet van seden
Van Iesu waren bemint
Hi was haer liefste vrient
Sij hebben hem ontsangen
Na hem staet al haer verlangen
Hi was int herte gheprint
3.
Ende als hi is gheganghen
Int huys daer Martha was
So neerstich ombeuanghen
Om hem te voeden ras.
Magdalena op dat pas ||
Is bi sijn voeten gheseten
Oprecht van haer vermeten
Want hi haer souden ghenas
4.
Si was in sijnder minnen
Seer vierich ende vast
Haer herte ende al haer sinnen
Had si op hem ghepast.
Si en dacht op gheenen last
Op hem si contempleerde
Haer herteken iubileerde
Hi was so weerdighen gast
5.
Sijn vierige woerden crachtich
Sijn suuer leeringe soet
| |
[pagina 123]
| |
Die waren also machtich
Si veruulden haren moet
Si en socht gheen ander goet
Bi hem so woude si bliuen
Ende in hem oock becliuen
Hi was der minnen vloet
6.
Martha seer sorchfuldich
En conde vergheten niet
Si was seer onuerduldich
Dat haer Maria liet
Si seyde/ heer nu besiet
Mijn suster en is niet werckende
En sidy dat niet merckende
Segt haer dat si doe/ dat si te doene heeft.
7.
Iesus die soete heere
Onser alder toeuerlaet
Heeft haer met sijnder leere
Besceyden als aduocaet
Hi sprack/ ten is niet quaet
Want een voer alle dinghen
Is noot/ het sal v bringhen
Totten volmaectsten graet
8.
Maria heeft wtuercoren
Dat een/ seer wijsselijck
In mi is si herboren
Ende seer gheworden rijck
Si peyst seer danckelijck
Dat alle dinghen blijckelijck
Ende nader werelt wijckelijck
Sijn alle verganckelijck
9.
Maria heeft wtghelesen
Dat alder beste deel
Haer hertken is op gheresen
Tot in des hemels casteel
Ende inder minnen pricel
Daer is si haer vermakende
Ende mijnder liefden smakende.
Die bi haer blijft gheheel.
10.
Hi heeft haer willen seghen
Enden allen menschen claer
Dat niet en was te pleghen
Dat Martha dede daer
Maer dat bescouwen voerwaer
Den werck gaet verre te bouen
Dus die volcomelijc wil louen
Den heere/ die stae hier naer. ||
11.
Dese bedinghe suyuerlijck
Heeft haer Iesus gheleert
Ende si seer dancbaerlijck
Heeft sinen lof vermeert
Ende heeft tot hem ghekeert
Haer werck ende al haer sinnen
Dat si hem soude ghewinnen
Ende met hem sijn gheeert
12.
Wilt dan tot desen stonden
Gods kinderen alle ghemeyn
Gaen beteren uwe sonden
Ende metter herten reyn
Vlieghen na tshemels pleyn
Want daer suldy beschouwen
Dat v niet en sal rouwen
Och this seer groot certeyn.
|
|