Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise1.
DIe alder soetste Iesus
Die alder miltste heere
Hi mint die reyne maechden
Die maechden also seere
Ende siet vanden hemel wt
Hoe suuerlijc dat si is ghedaen
Sijn wtuercoren bruyt.
2.
Hi sprac/ verblijt v maghet
Edel roose root
Om v heb ick gheleden
Den bitterlijcken doot
Des danct mi tot alder tijt
Keert v tot mi in alle uwe noot
Ick sal v maken verblijt.
3.
Ic liet mi om uwer minnen
Aent hout des cruycen slaen
Dus wilt met bliden sinnen
Doer mi dat cruyce ontsaen
Ende draghen blijdelijck
So sal ick v hier nae vriendelijc
Ontfaen al in mijns vaders rijc
4.
Daer sal ick v gheuen
| |
[pagina 118]
| |
Der maechden dierbaer croon ||
Die gheheeten is Aureola
Al bouen maten schoon.
Die sullen si draghen alleen
Die nu den viant wederstaen
Ende bliuen maghet reen
5.
Bouen alle heylighen
Die daer zijn inden troon
So vercrigen daer die maechden
Een sonderlinghen loon
Ende singen eenen nieuwen sanck.
Ende elcken voetstap die sy inden hemel treen
Gheeft eenen soeten clanck
6.
Maria die ouer scone maget
Si leydet daer den dans
Ende alle die soete maechdekens
Die draghen een gulden crans
Die is gemaect van lelien soet
Want si haer stolen al wit ghewasschen hebben
Al in des lammekens bloet.
7.
Daer wort Iesus die brudegom
Dat soete lammeken geuoet
Onder die lelien
Dat suyuer maechden sijn
Die hem al om beringhen
Ende duysent dusent ende hondert du sent
Vrolic alleluya singen
8.
Si schouwen blijdelijcken
Dat godlijck aenschijn
En volghen stadelijcken
Dat soete lammekijn.
So waer dat benen gaet.
Dit vercrighen alleen die ootmoedich ende reyn
Die hem hoeden voer misdaet
|
|