Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op die selue wise.1.
DIe mensch is seer dom ghesint
Die eenich dinc ter werelt mint
Ende rust op creatueren
Der weerelt blischap en is niet dan wint.
Si loont met eewich trueren
2.
So wie dat aertsche minne draecht
Die sie wel toe wat hi iaecht
Dat hem na niet en rouwe
Si heeft mi somtijts oock wel behaecht
Maer ick en vantse noyt ghetrouwe.
3.
Der werelt minne is al niet
Si brengt den menigen in verdriet
Ende bangicheyt van binnen
Maer wie sijn herte tot Gode keert
Veel rusten sal hi vinden
4.
Iesus is so schoonen man
Mijn ionge herte dat ic hem gan
Bouen alle creatueren
Mer wie dat Iesum minnen sal
Hi moet dat eerst besueren
5.
Iesus die is van hauen rijck
Keyser noch coninc sijns ghelijc
Coninc van shemels throone
Daer toe so is hi suyuerlijck
Bouen alle engelen schoone
6.
Hi is van formen gracelijc
Ende oock van seden weselijck
So is hi die ick minne
Sijn oogen staen so vriendelijck
Gheen mensch en macht bekinnen
7.
Op hem soe draghe ick hooghen moet
Ic hope het sal mi wesen goet
Die werelt laet ick varen
O God neemt mi in v behoet
Ende wilt mi altijt bewaren
|
|