Een devoot ende profitelyck boecxken

N^o. XXI.

ℂ Op die selue wise een liedeken van. S. Franciscus.

1.
WI willen heden vrolijc sijn
Op desen hooghen dach
Met onsen vader Franciscus
Diemen niet volprisen en mach
Want hi is waerlijck groot
O heylige vader Franciscus
Staet ons bi in onser noot
2.
Hi dede wt sijn cleederen
Die hi te draghen plach.
Hi werpse voer sijns vaders voeten
De werelt was hem een caf
Want hi is waerlijck. &c.
3.
Franciscus sach op sinen voet
Ghelijc dat doet die pauwe
Hi liet sincken sinen hogen moet
Ende dede aen die cleeden grauwe
Want hi is waerlijck. &c.
4.
Hi is seer goedertieren
In sinen ommeganck
Sijn hertken bloeyt van binnen
Ghelijc een wijngaert ranck
Want hi is waerlijck. &c.
5.
Doen dese heylighe vader
Dus vast in duechden ghinck
Werthi so vierich in Christus minne
Dat hi die vijf wonden ontsinc
Want hi is waerlijck. &c.
6.
Hi is seer goedertieren
Van duechden op aertrijck
Van binnen ende ooc van buten
So en is niemant sijns ghelijc
Want hi is waerlijc. &c.
7.
Nu is hy op gheuaren
Hier bouen int hemelsce lant
Al in dat choor der seraphinnen
By Christus rechter hant
Want hi is waerlijck. &c.
8.
Nu laet ons hem bidden
Met groter innicheyt
Dat hi ons wil verweruen
Die duecht der ootmoedicheyt
Want hi is waerlijck groot
O heylige vader Franciscus
Staet ons bi in onser noot.