Een devoot ende profitelyck boecxken

N^o. XX.

ℂ Op die selue wise. Van sinte Hieronymus.

1.
O God lof moet v altijt sijn
Al bouen der engelen choor
Al met die lieue moeder dijn
Ende dinen heyligen confessoor.
Die daer is waerlijck groot
O heylige vader Hieronyme ||
Staet ons bi in onser noot
2.
Hi is een sterre gheleken wel
Die doer den neuel schijnt
Want hi verwan die ketters fel
Die daer seer waren ghepijnt
Om sijnder leeringen groot
O heylige vader Hieronime
Staet ons bi in onser noot
3.
Hi heeft verlicht heel kerstenheyt
Alsmen daer wel op let
En de scrifture daert al aen leit
Heeft hi claer ouer gheset
Met swaren arbeyt groot
O heylige vader Hiero. &c.
4.
Sijnder duecht hadde dien leeu te bat
Die hem in den doerne hadde ghewont
Ende quam gheloopen daer hi sat
Op dyen seluen stont
Ende toonde hem sinen poot.
O heylige vader Hieroni. &c.
5.
Dat hi so heylich was
Dat suldy wel verstaen
Die leeu dyen hi den voet genas
Die was hem onderdaen
Met sinen arbeyt groot.
O heylige vader Hieroni. &c.
6.
De reynicheyt heeft hi bemint
Dies hadden die sommige nijt
Die in haer sonden waren verblint
Ende bespotten hem met spijt
Ter woestinen dat hi doen vloot
O heylige vader Hieroni. &c.
7.
Sijn heylicheit was daer vermaert
Ende sijn penitencie swaer
Van daer track hy te Bethleem waert
Een clooster stichte hi daer
Daer woonde hi tot synder doot.
O heylige vader Hieroni. &c.
8.
Doen hi was out bi hondert iaer
Quam hem een siecte aen
Hi sprac tot sinen broeders claer
Wilt mi ontcleeden gaen.
Ende legt mi op die aerde bloot.
O heylige vader. &c.
9.
Aldaer hi op die aerde lach
Eer hi schiet van aertrijck
Ten hemel dat hi opwaert sach
Ende hi sprac minnelijck.

[p. 42]

 

⁺

 

Och willecoem bitter doot

 

O heylige vader Hier. &c.

 

10.

 

Als hi aensach de broeders sijn

 

Seer weenende so sprack hi

 

Mijn alder liefste kinderkijn

 

En weent doch niet op mi

 

Bemint malcander totter doot.

 

O heylige vader. &c.

 

11.

 

Laet ons hem dienen tot aldertijt

 

Ende bidden ootmoedelijc ||

 

Dat hi ons na dit ouerlijt

 

Wil brenghen in hemelrijck

 

Daer hi is waerlijck groot

 

O heylige vader Hieronime

 

Staet ons bi in onser noot

+ Fo. xiiij.^v-Fo. xv.^r