Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 22]
| |
Daer machmen wonder horen
Van meniger stemmen fijn
Sij spelen die melodien
In so menigerhande wijs
Voer lesum ende Marien
Dat niet te begripen en is.
3.
Die. xxiiij. ouden schoone
Staen voort met haesten seer
Sij offeren daer die croone ||
Voer Iesum onsen heer
Si hebben ooc den rechten trede
So menich iaer lanc gheleert
Sy singen en springen mede
Op dat hi sy vol eert
4.
Die vier euangelisten
Sijn bouen gout scoon gecleet.
In soe wonderlijcke listen
Als daer van ghescreuen steet
Veruruechden hem also seere
Ende die baptiste sint Ian
Dat nu noch nemmermeere
Gheen man volgronden en can
5.
Dauid met sijnder herpen
Die maect so groten ghescal
Dat steden ende oock dorpen
Moghent hooren ouer al.
Hi roert die soete snaren
Voer Iesum alsoe hi plach
Dat hondert duysent iaren
Daer en scijnt niet eenen dach.
6.
Propheten en patriarcken
Mit purpur bysse ghecleet
Ende Noe mitter arcken
Inden rinc al mede gheet
Sij verbliden hem sonder beyden
Voer Ihesum haren troost
Die inder hellen screyden
Daerse Iesus wt heeft verlost
7.
De apostolen blincken groene
Veel schoonder dan samnijt
Dat mengt haer vruecht scone
Daer si nemmermeer wort besmit
Sij maken daer melodie
In soe soeten musica
Dat Iesus ende Marie
Daer seer gaerne hooren na
8.
Ridders ende martelaren
Als eenighe roose root
Bloeyen in haer vierscharen
Ende driuen bliscap groot
Sij spelen in vieriger minnen
Voer Iesum tot alder tijt
Dat alle dat hemels ghesinne
Wel seer daer af is verblijt
9.
Die heylighe confessoren
Die hebben der vruechden veel
Sij blincken in haer choren
Veel scoonder dan blau fluweel
Wt blauwe so suldy mercken
Haren saechten stadigen moet
In woerden ende in wercken
Soe sijn si voer Gode goet.
10.
Heremiten ende monicken.
Hooren mede in dit ghetal
Oock priesters ende canonicken
Die singhen te gader al.
Sij dienen soe eersaemlijcke
Ende singhen voer Iesum lor.
Alle die sijn in dat rijcke
Vernieuwen hen seer daer of ||
11.
Ioncfrouwen reyn van seden
Die climmen den hoochsten graet
| |
[pagina 23]
| |
Si gaen al na Iesum treden
Waer dat hi henen gaet
Si blincken in haren troone
So reyne ende so claer
Noyt lelie en was so schoone
Si en wert besmet bi haer
12.
Si connen iubileren
In also menigherwijs
Oock singen ende discanteren
Dattet niet te dencken en is
Och wat soeter melodye
Hoortmen inder maechden choor.
Want Iesus ende Marie
Die singhen daer selue voor
13.
Dat ghetal is sonder mate
Die daer alle singhen claer
Van so menigberhande state
Dattet niet te scriuen en waer
Want sy sijn al int ghemeyne.
Van allen consten gheleert
Mer Iesus eest alleyne
Die alle dit ghesinne regeert.
14.
Wat mach dan daer ontbreken
Daer Iesus dat selue gheeft
Datmen dencken mach oft spreken
Elck dat gheuoelen heeft
Al woude sy inder hellen
Rechteuoort so sijn sy daer
Ende souden sonder quellen
Iesum scouwen puer ende claer
15.
Elcken dunct int ghemeyne
Dat Iesus hem mint so seere
Recht oft hijt waer alleyne
Och wat is dit wonders meere.
Elck mint die vruechde clare
Die hi aen den anderen siet.
Recht oft sy sijns selfs ware
Also is hi daer in verblijt.
16.
Alle dat van beghinne
Oyt van Adam ghecomen is
En soude in gheenen sinne
Volscriuen in gheender wijs
Een graet der minster vruechden
Die de nedersten daer in plien
Nochtans niemant en soude.
Al veel lieuer Iesum sien.
17.
Die Iesum siet alleene
Die mach hem spieghelen claer
Die dinghen al int ghemeene
So roepen sy alle daer.
O wel lieue soete Iesus
Nv weest ghebenedijt
Sanctus sanctus en sanctus
Nv ende in alder tijt
18.
Mijn machte wil mi breken
Mijn herte van binnen beeft
Als ic te gronde wil dencken
Hoe Iesus mi hier in heeft ||
Met so wonderlijcke goede
Al na hem seluen ghewrocht.
Ende met sinen heyligen bloede
Tot deser vruechden ghecocht.
19.
Als ick dit ouerdochte
So gheuoelde ick wat in mi
Dat Iesus dien ick seer sochte.
Met sijnder gracien is bi
Dat herte wil mi ontsincken
Ick en weet waer henen gaen
Want hi mi meynt te scincken
Den soeten hemelschen traen.
20.
Mi dunct ick heb vernomen
In minen sinne voorwaer
| |
[pagina 24]
| |
Dat ons te hulpe sijn comen
Veel duysent enghelen claer
Welop ende laet ons springen
Ende Iesum minnelic ontsaen
Ende met vruechden singhen.
Droeue werlt ic wil v versmaen
21.
Haelt ons wt dese alleynde
Wi willen ons pinen voort
So moghen wi sonder eynde.
Iesum dat minnelijck woort
In so grooter melodyen.
Met al den enghelen schoon
Altoos ghebenedyen
In dinen hemelschen troon
22.
IESVS ende MARIA
Wi bidden v ouer al
Wilt ons arme siele dan vriden
Wanneer sy scheyden sal
Ende als dat herte sal breken
So helpt ons dan aldus
Dat wi met vruechden spreken.
Ghelooft Maria Iesus. Amen
|