Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekendℂ Op dye selue wijse.1.
GHenoechte willen wi hanteren
In Iesum vrolijc sijn.
Ende blijdelijck iubileren
Wt reynder herten fijn.
Hi is mijn troost alleene
Mijn eenich toeuerlaet.
Daer al mijns hertsen minne
Mijn hope: mijn troost aen staet
2.
Daer om so wil ick laten
Die werelt al gheheel
Op dat sijn charitate
Mi vallen mach een deel
Dat honich sijnder minnen
Dat melck sijnder soeticheyt
Waer mede ic mach verwinnen
Alle mijnder herten leyt
3.
Der werelt hier te steruen
Dat is een cleyn gheschil.
| |
[pagina 21]
| |
Op dat wi mogen verweruen
Gods troost na onsen wil
Och mocht ons dat gheboren.
So waer ons wel gheschiet
Voer al dat ick lijde opt aerde
Dat en waer mi geen verdriet
4.
Onder alle creatueren.
Had ick eens troost ghesocht
Op dat alle mijn trueren
Also ten eynde sy brocht
Mer wat ick dies mi pijnde
Het was al arbeyt om niet
Ic en vant daer niet te iaghen ||
Dan hertsweer/ druc/ en verdriet
5.
Dat iaghen mijnder sinnen
Ende oock mijn blint verstant
En lieten mi niet bekinnen
Dat mi nu is bekant
Maer al dat is beneden
Der hoogher triniteyt
En mach mi niet verseden
Als mijn begeerte daer toe steyt
6.
Als ic dit heb versonnen
So stelde ick eens voer al
Ende hebt met hem begonnen
Nu hope ick dat ick sal
Mijns herten wille verweruen
In hem staet alle mijn troost
In sijn minne te steruen
Dan worde ick al verloost
7.
Mijn God mijn eewich leuen
Mijnder sielen medecijn
Ick heb mi dy ghegheuen
Dijn eyghen wil ick sijn
Ick gheue dy alte male
Herte/ siele/ lijf/ al gheheel
Coemt heere in v sale
Ende laet ons worden een
8.
O prince van allen heeren
Mijn alder liefste lief
Tot v staet mijn begheeren
Ghi staet int hoochste brief.
Gheen herte en mach dit weten
Noch dencken in gheen schijn
Hoe hooghe ghi sijt gheseten
Al in dat herte mijn.
9.
O Iesu wtuercoren
Alder liefste minnaer soet
En laet ons niet verloren
Alst ymmer wesen moet.
Als wij dan moeten scheyden
Wt desen droeuen dale
Soe wilt ons dan gheleyden
Tot in die hoochste sale. Amen.
|
|