Een devoot ende profitelyck boecxken
(1889)–Anoniem Devoot ende profitelyck boecxken, Een–
Auteursrecht onbekend
[pagina 17]
| |
No. I.aant. 1.
Solaes wil ic hanteren
Ende daer toe vrolijck sijn
En blijdelijck houeren
Met Iesus mijn minnekijn
Waer om so willen wi trueren
Ten mach anders nyet sijn
Ten sal niet langhe dueren
Dat ick bedruct sal sijn. ||
2.
In alle die werelt wide
En vinde ick niet so goet
Dat mi mach maken blide
Dan Iesus mijn minneken soet
Hier om wil ick mi gheuen
Hem te dienen tot alder tijt
So wordic van herten verheuen
Ende eewelijck verblijt
3.
Hy is een heer der heeren
Die schoonste diemen vint
Ick wil mi tot hem keeren
Want hi ons so seere bemint
Gheen hert en mach versinnen
Die bliscap die hi heeft bereyt
Den ghenen die hem minnen
So ons die scriftuere dat seyt
4.
Hy is een bloem gheheeten
Seer suyuerlijck ende claer
Hy is so hooghe gheseten
Al bouen der enghelen schaer.
Gheboren tot onser baten
Van eender maget bequaem
Als bouen honichraten.
Is soeter Ihesus naem.
| |
[pagina 18]
| |
5.
Wanneer sal ick anscouwen
Sijn ouer claer aenschijn
Och mocht ick hem behouwen
Al in dat herte mijn
Wat mi mocht ouer comen
En soude ick achten niet
Waert soe het soude mi vromen
So en had ick gheen verdriet
6.
O god wilt mijns ontfermen
Doer uwen name fijn
Ende wilt ons doch bescermen
Al vander hellen pijn
Ende wilt ons doch gheleyden
Ende bringhen int eewich rijck
Als wij van hier al scheyden
Dat bidden wij al ghelijck.
|