Declaratie van der triumphe bewezen den hooghe gheboren prince van Spaengien, Philips

(1851)–Anoniem Declaratie van der triumphe bewezen den hooghe gheboren prince van Spaengien, Philips– rechtenstatus


Autheur. Als Pallas haer reden dus heift begloost Zeer cleinen troost const ic van drien vaten Want al diueers was haerlier propoost Dies ic my weinschte wel ouer thien straten. En hoe wel dat se naerstich om dit bedien zaten Thes al ghedroomt zeidic zo ic my duchte. En op dat ic mochte dees fantsyen laten Zo ontwecte mij Phebus die binden luchte Met zijnen waghe maecte groot gheruchte. Bin dat ic mijn droom te spellene vermete Zo comt duer een splete mijn camer binnen Aurora, van den dagh mij doende de wete. En tvisioen van deze drie goddinnen Ontvloogh mij rasch als cherubinnen. Dies ic haer beuel niet en acht de een ziere Maer ghijnc mij bij d'licht te cleedene beghinnen Twelc mij verleenen quam zeer goedertiere Aurora van Phebus claer de fourriere.
[pagina 15]
Doen ghijnc ic naer Ghend die straten besteppen Duer plasschen en greppen die my niet en weken En waer ic twee of drie met langhe sleppen Of cort ghecleed zach te gader spreken Daer most ic mijn hooft bet naerder steken Twas al van triumphe dat elcx motyf was Ten eijnde die zaken mij veel claerder bleken Want t'bediedsel vandien elc man en wijf las. Twas wel te ziene datt edel bedrijf was. Nu viel mij tverstant in van mijnen drome Van die ic hier nome dat edel pand Gheboren van Chaerles den Keyser vrome Commende bezwaeren zijns vadersland Dus vlied, ghy fabuleuse Goddinne, want Hy lettel past op hu blau beles Want God bouen alle goden valiant Duer wien elc goed Prince regnerene es Bied zelue dees Prince zijn godlic addres. Nu es ghecommen dat ghenouchlic saisoen Naer mijn gheuroen noijt blijder heure Als dat vut Ghend menich edel baroen Met flueel ghecleed van zwarten coluere. Den edele Prince bij naerstighen spuere In t'ghemoet ghereden es zeer wel ghemonteirt Zegghende (op dat dijns vaders wille ghebuere) Comt Prince in Gods name in vlaenderen regneirt Dit werd in vijf tooghen rein ghefigureirt.
[pagina 16]
Als dan die Prince t'casteel was nakende T'gheschut was makende een horijbel soon T'scheen dat Vulcanus zijn blixems blakende Metten donder zand naer Iupiters throon Om die ruezen te cranckene die zijn persoon Versmaedden: en wilden den hemel bestormen Daer lach een versleghen up die Riuiere schoon Ter poorten die rekende ic spijse der wormen Hij wast dertich voeten lanc aduenant van vormen. Dus comt hij ter stede waerd gheconuoijert Zeer gent verciert inder vlaemscher landauwe Rethorica die hadde an die poorte ghefouriert In een rein pauwelioen een maegdelicke vrauwe Des stads figure, en die zuuer Kersauwe Werd minlic ghetroetelt en zeer ghetouft Van eenen witten leeu, die om smaghets trauwe Dafionste van Fortune dicwils heift gheprouft Zulc ziet men noch verhueghen die was bedrouft. Gordijnen van flanneel ter poorten verhaelt Schoof men onghedraelt, vruegd mostder verstercken. Vier vrauwen (zoot scheen) vuten hemel ghedaelt. Die elc Prince vermaenden tot edel ghewercken. Prudentia sprac tot leecken en clercken. In eerlicke zaken ligt mijn hantieren. Intelligentia can alle dijnghen duermercken. Memoria verhaelde voorleden manieren. Prouidentia wildit al in tijds bestieren.
[pagina 17]
Arnulphus die Graue ghenoemt de groote Niet als de bloote was fray veriaghende De Normans, die bij oorlooghschen exploote Vlaender en Vranckerijc waren plaghende. Dit was zijn Image voor haer draghende In t'zelue tonneel op t'hoochste verheuen. Dus es men der Princen duegt ghemaghende. Die naer de gherechticheit beleeden haer leuen. Die prijs verdienen, moet prijs zijn ghegheuen. In d'eerste strate ghezeijt den steendam In oorden bij een quam die gheestelicke statie. In welcke strate die Prince wel eens nam Zijn ghenouchte, mijds d'hemelsche iubilatie Die daer scheen blijckende telcx contemplatie Duer onnoosel maegdekins, ionc al te male. Al rekewijs staende, bij ghelijcker spatie. In tabernakelkins bijna dusent in ghetale. Ouer bee zijden der straten tot sprincens zale. Al waert dat men mij te zwijghene dwonghe Noch zoude mijn tonghen spreken binden monde, Behaghelic es Gode d'lof vandie tonghe. Want zij onnoosel zijn en simpel van gronde. O Rethorica lief dijn zoete faconde Verleent mij dat ic haerlier prijs bescriuen mach Van diemen als kinderkins ten zeluen stonde Ter eere den Prince triumphe bedriven zach God gheue dat elc kind in duegden becliuen mach.
[pagina 18]
Men zach ter waerelt noijt schoonder spectakel. T'dijnct mij mirakel niet om verzoeten. Zo menich kind staende in zijn tabernakel. Hooghe vander aerden verheuen acht voeten. Elc zijn kespen mant elkin gheploijt met moeten. Elc had zijn roxkin rood daer duere schijnende. Met een vierighe tordse, quansuus om groeten, Zijn zone, wiens iuegd niet en es verdwynende. Met rechten was men dit tzijnder eere pijnende. Tzijnder eere stonden ghemaect zeer cantelic Vijf poorten plaisantelic duerluchtich om zien. Arcus ghenaemt, of tooghen triumphantelic. Van vijf conijncrijcken was t'patroon van dien. T'hebreeusche, t'griecsche, t'roomsche met t'fransche engien. En t'vijfste vertoogde die vlaemsche noblesse. In elc van viue zag men t'zelue gheschien. Vijf zonen aenuaerden bij vaderlicken addresse Successie, maer met een vruchtbarighe lesse. D'eerste boghe triumphael, dies ic vermane Had vander Tuscane specie de snede. Een hebreeus exempel was beuolen te stane Met hebreeuscher scrifture ter zeluer stede. Hoe Dauid beseffende den tijd zijnder vrede Solomon zijnen zone den scepter beual. Dies wert hij daer ghesalft naer de iuedsche zede Van Sadoc ende Nathan Gode lief ghetal. Daer spraken die maegdekins hebreeus ouer al.
[pagina 19]
Die stad zo gherne dezen Prince gheriefde. Want zoo gheliefde zijn vader bemind. Die maegdekins boden hem Trauwe en Liefde In zeven talen wel ghelijc ghezint O trauwe wiens zoetheit alle blomkins verwint Ghy waert bij die blomkins ghecompareert. En ghij vierighe liefde die int herte beghint. Hebt hem een vierighe tordse ghepresenteert. Alzoo die maegdekins waren ghestoffeert. D'hebreeusche scrifture die hier ghezien was Zo menich engien las, werd aldus bediet. Als t'cronement van Solomon int gheschien was. Sprac Dauid duer den gheest Gods diet al voorziet. Ic zal Solomon lasten en den anderen niet. Naer mij te bezittene die Maiesteit. Ende naer dat zijn beghaerte was gheschiet. Zo heift hij tot gode dancbarich ghezeit. Nu zie ic hem in mijn throon zitten die mij greit. Tot Solomon wert ghezeit, o cuenijnclic stuer. Des hemels faueur verheffe dijnen name. Bouen Dauid dijnen vader: ooc zonder ghetruer. Dat den gheest des heeren met hu verzame Ghelijc met hu vader: huwen throon zonder blame. Moet God bouen dijns vaders throon funderen. Ecclesiastes spreict noch een rede bequame. Dat die landen wel mueghen prospereren. Daer Princen van edelen bloede regneren.
[pagina 20]
Dit hebben ghezien die edel rancke Es vrij als de vrancke bet voord ghemarchierd. Dier prelaten verbeiden daer tzijnen dancke. Beneden der brugghe vande dam ghespecifiert Mijn Heere van Sent Baefs zebarich ghemaniert. Ghijnc hem in tghemoet met groote reuerentie. En presenteirde hem te cussene een cruce, verciert Dan Sent Eloij, van grooter exellencie . Dit beteekende paijs vut goed' intentie. Naer dat hij gheleden was Sent Iacobs kercke Stont daer ten percke Rethorica diligent. Eenen toogh of spectakel van edelen wercke. Heift zou allen Princen ghemaect bekent. Justitie stond daer als vrauwe excellent. Costume Wet Nature dede haer omage. Maer Nature had zeuen camerieren gent. Ghaerne obedient zoomen zagh op t'stage. Elc scheen wel een hemelsche personage. Alle deze Nijmphen hiervooren vermaerd Daer tzamen vergaert toogden haer diuijsen Costume sprac, tghene dat van ouder aerd Zonder wet gheuleert es doe ic mij toe wijsen Wet dede rechtuaerdicheit in ghescrifte rijsen Nature doet t'menschelic verstand ghedijncken Gods eeuwighe wille, die den gheest comt spijsen Religie leert Gods zuuer diest zonder mijncken Duegt wil elc in d'een haer zeluen schijncken.
[pagina 21]
Gratie zeide, die duegd wil ic eeren Met die croone ter eeren, thes mijn costume Wrake wil gheweld en iniurie keeren Discretie vereert d'eerweerdighe int rume Waerheyt toogt een dijnc zoot es op haer dume Compact can twist en ghevecht doen scheeden Maer dat ic van Justitie niet en versume Zou kan haer woordekins zeer wel beleeden. Alzoomen haer bij scrifture zach verbreeden.

Vorige Volgende

Autheur.