Dagboek van Gent van 1447 tot 1470. Deel 2

[1481]

Up den VII^en dach van hoeymaent anno XIII^c ende LXXXI,⁺ was binnen der stede van Antwerpen, by nachte moerdadelic ghequetst, Mer Jan van Dadisele, ruddere, hoochbaelliu van Ghendt, 's nachts tusschen den X ende XI hueren, ende dede mynheere van Montyngny, uut laste van vrouw Marie van Borgoingnen, zo de fame ghenouch liep, 't fait.

Up den XX^en dach van hoeymaent anno LXXXI, overleedt Mer Jan van Dadisele, binnen der stede van Antwerpen, van der quetse die hy ontfync up den VII^en dach van deser maent. God ghedyncke de siele⁽³⁾.

Up den XXI^en dach van hoeymaent anno LXXXI, tusschen den VII ende VIII hueren in der nacht, was dlichame van Mer Jan van Dadisele brocht binnen der stede van Ghendt ende ghestelt in den coer tSente Jans, daer men ter zelver tyt dede doen, uuter name van der stede, vigilien met IX lessen, daer scepenen van beede de bancken waren, metsghaders beede de dekenen ende andere notabele mannen van den drye leden der stede van Ghendt, alle met swarten habyten anne, heycke ende

+ 1481.

(3) Jan van Dadizele wiens Gedenkschriften voor de Société d'Emulation de Bruges werden uitgegeven door Kervijn de Lettenhove (Brugge, 1850); over dien moord zie de Excellente Cronike, f^o ccxxij v^o; vgl. Adr. de But, Chroniques, blz. 569, en Kervijn, Histoire de Flandre, D. V, blz. 324-326.

[p. 256]

kapproen; 's daeghs daer naer, 's morghens ten VI hueren, was ghedaen eene uutvaert, te wetene de messe. ende doe was dlichame, met processien van der prochiekerken ende den bovenghenoumden wethauders ende den notabelen persoonen, gheconvoyeert totter poorten te sente Pieters, van daer men 't voorts te Dadiselle⁽¹⁾ voerde, daer 't begraven was, ende trocken metten lichaeme twee scepenen van der kuere ende een van ghedeele tot Dadiselle, ende de zelve scepenen trocken oock jeghen dlichame in 't incommen tot Pots⁽²⁾. Van der stede weghen waeren XX tortchen, die de boden van beede de camere droughen, van den poorten in 't incommen totter andere poorten in 't uuttrecken, ende in de kercke, den dienst gheduerende.

Up den XXIX^en van hoeymaent anno LXXXI, was de stede van Atrecht⁽³⁾ vercocht ende ghelevert by den heere van Cohem ende heere van Gapammes, meyere.

In t' zelve jaer, cort voor october, waeren de Jacopynen te Ghendt, by ghebode van heere ende wedt, met ludene van trompetten van straete te straete, uuyt der aelmoesse gheseidt⁽⁴⁾, ende elcken verboden, up viant te zyne van heere ende wedt ende up correctie van scepenen, dat niement met hemlieden conversere zoude, in huerlieder kercke ghaen, noch duecht doen enz., ende waeren besloten.

(1) Dorp van West-Vlaanderen, tusschen Roesselare en Meenen gelegen.

(2) Pottes, dorp van Henegouwen, op de Schelde, tusschen Pecq en Avelgem.

(3) Lees: Arien, Aire; vgl. De But, Chroniques, blz. 569.

(4) Uyt den aelmoessen gheseidt, het inzamelen van almoezen verboden; al de stukken dit verbod tegen de Predikheeren aangaande, zijn verzameld door Pr. Dr. Fredericq in zijn Corpus Documentorum Inquisitionis, D. II, blz. 273-277.