Dagboek van Gent van 1447 tot 1470. Deel 2

Hier naer volghen vele diversche persoonen die int regement geweest hadden van deser stede, scepenen van der kuere ende andre offitien gheexeerceert hadden, te vele diveersche tyden daer zy groote ghiften af ontfanghen hadde contrarie haren eede⁽³⁾.

Meester Joris Tsuul hadde van Pieter den Hane omme tghedynghe dat hy hadde jegen thoyr van Janne Willaert

III lb. gr.

Meester Monfrant Alaerts hadde ter causen van den ghedynghen dat Lanseloot van Reyghersvliete hadde jeghen her Janne van den Hende ende mynder vrauwen van Massemen IX lib. gr., by waerften ontfaen van Lanceloots wive ende zijnen cnape.

(3) De eerste kopist eindigt hier plots zijn afschrift met eene lange lijst van knevelarijen en geldafpersingen, in 1452 ten laste gelegd van verscheidene wethouders en ambtenaars.
Deze lijst volledigt deze van Deel I, blz. 285-297. - Schayes, in zijne uitgaaf, liet dit stuk weg, als ‘van weinig belang’ zijnde.

Bedreghen te vullen bedraghe.

Meester Pieter Baudins hadde van Claeyse van Herste ende van Hanssen

[p. 241]

Mettenmonde, botters, omme dat hy beletten zoude dat zy nyet ghebannen en zoude zijn, van elcken XVIII sc.gr. comt:	XXXVI sc. gr.
Jacop van der Verst hadde van den voorseyden botters over de voorseyde maccaige die hy daer af maecte, van elcken III sc. gr. comt:	VI sc. gr.

Beede belast by eenen oorconde.

Jan van Huusse hadde van Raessen van Screlvelis, van Audenaerde, ten causen van den ghedynghe dat hy hadde jeghen her Janne van den Hende menichte van paveertichelen.

Bedreghen by eenen persoon.⁺

Jan van Secleer hadde van Pieter Beswits, lombaert, huut vreesen dat hem de zelve Jan dede te verstane datter ander lombaerden ghescepen waren te commene binnen deser stede de somme van X lib. X sc. gr. omme dat te belettene.

+ f^o 215 r^o

Belast van den persoon diet Janne gaf.

Meester Jooris Tsuul hadde van eenen twiste ghesciet int landt van Aelst in voormen van corruptien

III lib. gr.

Bedreghen by eenen oorconde.

Lievin van der Palen en Pieter Beys hebben ghehadt van Meester Janne den Sceppere smet, omme dat zyne betalen zouden van der scult die hem de stede, sculdich was zonder overstellen elc een paer branders weert elc paer

XVI of XVIII sc. gr.

Bethuucht van den ghenen diet gaf.

Willem Valcke hadde van Pieter Hungs weghen omme dat hy nyet ghebannen en zoude zyn van coorne huut te voerene

[p. 242]

daer af dat hy berucht was, vier lib. gr. Niet jeghenstaende dien wart de voornoemde Pieter ghebannen in svoorseits Willems absentie, maer ghecreech naer der hant van Willem Valcx broeders wedere omtrent

II lib. X sc.

Belast van eenen persoon.

Jan van den Doorne naer zyn verkennen ende verlyen alzo dryncken een ghelaghe metgaders den onderbaelliu ende meer andre scepenen van der kuere van XIIIJ sc. III d. gr., dwelcke eene vrauwe name omme dat zo nyet ghebannen en soude zyn gheheeten Lyne Smeys. Ende een persoon heeft ghetuucht dat ghelaghe nyeuwerna zo vele en drouch, ende dat Jan van den Doorne hadde tsourpluus van dat min drouch.

Meester Jooris Tsuul zoude gheadt hebben van Janne Mesdach XXII gr. ten tyden doe de zelve Mesdach zeker ghedynghe hadde voor scepenen van ghedeele ende ooc voor scepenen van beede den bancken omme een soendync. Maer en wistte de orconden nyet te wat occusoene.

De zelve meester Jooris teender ander reysen zouder ghehadt⁺ hebben van den zelven Mesdach noch VIII lib. gr. ghetuucht by eenen oorconde die oock nyet en wiste te wat occusoene.

De voornoemde meester Jooris, Pieter Goetghebuer, Jan Clocman scepenen doe, Heynderic Meyeraert ende meer andere scepenen, theerden by waerften te Jans Ooghen in 't Zwaenkin ende verdroncken diversche ghelaghen daer voren de zelve Mestdach betaelde

III lib. gr.

+ f^o 215 v^o

Ghetuucht by eenen persoon.

De hauderigghe ende thoyr van meester Jooris Tsuul hebben versocht hier up ghehoort te zyne ende ghetooght eene wettelicke purge begheerende die te houdene staende in wettelicke vierscaren.

[p. 243]

Willem Quilget hadde van Janne Mesdaghe VI lib. gr. voor eene maeltyt die Willem gaf scepenen van beede den bancken alzo hy zeide omme de voordernessen van Mestdaechs saken.

Bedreghen te vullen bedraghe.

Pieter Goetghebuer es bedreghen by eenen persoon dat hy hadde van Janne Mesdach de wulle van ondert scapen ende by eenen anderen persoon van C. ende L. scapen, daer af Mesdach noyt betalinghe ghecryghen en conste, want Pieter daer af nyet gheven en wille ende dit ter tyt van den voorseyden ghedynghe.

Meester Monffrant Allaerts zoude ghehadt hebben van Janne Mesdach ter causen van den voornoemden ghedynghe:

VI lib. gr.

Belast met eenen persoon.

Roege Temmerman by eenen oorconde dat hy ten occusoene van den voornoemden ghedynghe van den zelven Mesdach ghehadt soude hebben, scepene zynde, van corruptien II lib. X sc. gr. ende ten andren grooter sommen van pennynghen, maer nyet en wiste hoevele.

Baudin de Pratere bedreghen te vullen dat hem van Mesdaechs weghen pursembrieven ghegheven waren omme te lossene^+ zekere habyten ende juweelen der selvere Mesdach toebehoorende, daer up inden Pau gheleent waren VII lib. gr. principaels ende 10 sc. gr. van verloope svoorseiden Mesdaechs behouf, maer Mesdach en conste noyt wedere ghecrighen ende waren de voorseyde abyten ende juweelen weert

XIIII ofte XVI lib. gr.

Hier up begheert de weduwe Baudins Praters ghehoort te zyne⁽¹⁾.

+ f^o 216 r^o

(1) Onthoofd 5 December 1451, Memorieboek der stad Gent, D. I, blz. 237.

[p. 244]

Jan Goetghebuer soude ghehadt hebben van Mesdaghe meer dan XX sc. gr. in ghelaghen.

Belast met eenen persoon.

Jacop van den Damme soude ghedroncken hebben diversche ghelaghen scepene zynde die Mestdach betaelt soude hebben.

Belast met eenen persoon.

Jacop van den Damme soude ghedroncken hebben ende Martin Hurtebuuc soude ghehadt hebben van Janne Mesdach scepene zynde, twee voeder hauts.

Belast van eenen persoon.

Oste van de Wale hadde van Joose van Reynscoete eene voederynghe van jhannetten, weert II lib. gr., omme dat hy den zelven Joos helpen soude an tlant ende poort bethuucht by den persoon diese gaf, maer den selven docht dat hy se wel verdiende.

Jan Goetghebuer ontfync van Pieters wive Van den Gheenste in mieden XXII sc. gr. omme dat hy denselven Pieter helpen soude an zyne poort.

Belast by eenen persoon.

Jan van den Damme soude gheadt hebben van Staessene Buuc II lib. gr. ommedat hy hem helpen zoude in tvercryghen van zynder poort.

Belast by eenen persoon.

Pieter Boys (sic) hadde ghevoert van Stasine Buuc lx voederen orduuns te IIII gr. tvoer comt XX sc. gr. omme dat hy den zelven helpen soude an zyne poort.

Belast by eenen persoon.

^+ Pieter Hueriblock ende Claeys de Smet hadden van Janne Bochauts wive ten tyden dat se volghde om Jans poort, te verdryncken eenen guldenen van

XXVIII gr.

+ f^o 216 v^o

[p. 245]

Bedreghen by eenen persoon.

Jacop van den Hane, Christoffels de Grave, Jan van den Damme hadden ten occusoene voorscreven van den voorseyden Stasin in mieden elc een lam van

XXXII gr.

Belast by eenen persoon.

Jan Goetghebuer zoude ontfaen van Jans Bucx wive XX sc. gr., omme den zelven Buc te helpene an zyn poort, mids dat hy doe dekin was van der weverien.

Belast van eenen persoon.

Meester Pietere Baudins soude ghehadt hebben huuter name van Willems Ritsers weduwe II lib. gr. in aelsoenen omme een ghedynghe dat hy hadde jeghen Ghyselbrecht Hardync.

Getuucht by eenen oorconde.

Meester Pieter Baudins hadde van Philips van Huerne eenen selveren stoop pot, die hy andverde ende nam van den letryne ten tyden dat hy van der joncvrauwen Barbasans by scepenen ghenantiseert was.

Te vullen bedreghen.

Meester Pieter Baudins met meester Monffrant Alaerts hadden van aelsoenen ter causenen van den ghedynghen tusschen Janne van den Dale aan d'een zyde ende Lievyne Braembosch an d'andere, omme den zelven Jan te bescuddene van banne; dien nyet jeghenstaende wart ghebannen, naer der hant vercreghen svoorseyden Jans lant an den souverain omme niet ende rekende hem daer vooren

VIII lib. gr.

[p. 246]

Ghetuucht met eenen oorconde.

Jacop de Zaghere, filius Arents, soude gheadt hebben, scepenen van ghedeele zynde anno xlvj, van mynder vrauwen van der Zypen 1 gulden singnet alzo hy zelve ghekendt heeft ende dat ter causen van den ghedynghe tusschen Janne van der Zypen ende Philips van der Zypen, belast van eenen scepene die doe zyn medeghezelle was.

Lievins van der Palen wyf hadde van Symon Lachengioen een webbe besleghen, weert V oft VI croonen, twelcke Symon⁺ haer gaf naer dat hy scepene worden was, uute dien dat men hem zeyde dat costume was als een dekin yemene ghepromoveert hadde ter officien, dat men een juweel plaghe te scynckene zynen wive.

+ f^o 217 r^o

Belast by eenen oorconde.

Claeys de Smet scepene zynde hadde van Janne Mesdach een siége, die Wautere van Campene maecte, coste XVIII sc. gr. omme zyne zaken te voorderne.

Belast by eenen persoon.

Meester Pieter Baudins hadde van her Claeys Baers, priestere, III lib. gr. om tgedynghe tusschen hem ende zynen hoyre.

Belast van eenen persoon.

Meester Pieter Baudins wyf ontfync van Cornelis Bier, huut laste van Janne de Wint, XX sc. gr. ter causen van den ghedynghen tusschen hem ende scepenen van Temseecke belast by eenen persoon, ende dezelve tuuchde voort dat hy daer by ende an was daer de zelve Jan de Wint den voornoemden meester Pieter beloofde V lib. gr. omme dat hyne voorderen soude in tvoorseyde ghedynghe.

Pieter Hueriblock hadde van mynder vrauwen van der Zypen X lib. gr. ten tyden dat Philips van der Zypen harer zustere in huwelicke begreep, belast van mynder vrauwen zelve diet hem zelve gaf.

[p. 247]

Claeys de Smet hadde van mynder joncvrauwen voornoemt VI saluten ten voornoemden tyden ende ter zelven occusoene.

Belast ut supra.

De zelve maecte eene compositie jeghen Janne van der Zypen doen Baelliu van Ghendt⁽¹⁾, van Janne Hanssin omme XXIIII sc. gr., daer af Claeys behilt de XII sc. gr. over zyne moeite, belast ut supra.

Jan van den Damme hadde van Jan van der Zypen omme tgedynghe tusschen Janne ende Philips van der Zypen VIII lib. gr., omme te ghevene Pietren den Rycken doe dekin van der weverien, maer behiltere af over zyn moeite

III lib. gr.

Pieter de Rycke hadde vyf pont grooten van den voornoemden⁺ VIII lib. gr. omme te ghevene van den voornoemden ghedynghete Jans van der Zype apetite te voorderne, beede belast by eender vrauwen name.

Meester Pieter Baudins, meester Monferant Alaerts hadden van Roegen de Dappere wel XX lib. gr. onder in ghelde ende in lakene ter causen van den ghedynghe dat hy hadde jeghen Lodewyck Vintsegheere betuucht by eenen oorconde; ende van desen staet wat in d'eerste audientie.

Meester Jooris Tsuuls wyf hadde van Janne Mesdach een webbe besleghen met zelvere vergult, weert XXXVI scilde omme zyne zake te helpen voorderne.

(1) Jan van der Zijpen, heer van Wazières, was hoofdbaljuw van Gent in 1437-1443; Boudewijn de Vos, heer van Laarne, volgde hem op in 1444.

+ f^o 217 v^o

Belast by eenen persoon.

Meester Jooris Tsuul hadde van Janne Mesdach ter causen voorscreven eenen selveren cop, maer de persoon die't deposeerde en wiste nyet de weerde ende insghelycx eenen selveren croes daer af hy oock de weerde nyet en wiste.

[p. 248]

Pieter Goetghebuer scepenen zynde hadde van Janne Mesdach omme zyne zaken te voorderne	VI cappoenen.
Meester Jooris Tsuul scepene van der kuere zynde, hadde van Lievin van der Muelne omme zyne zake te voorderne te wette	V sc. gr.

Belast by eenen orconde die tghelt gaf.

Meester Jooris Tsuul hadde van Pieteren van Voesbrouc, scepene van der kuere zynde, VI lib. gr., omme dat hy hem zoude helpen van eender clachten up hem ghedaen van soendyncbrake.

Maer de zelve meester Jooris ordineerde hem in zyn testament restoor, daer af de weduwe ende thoyr jeghens hem ghecomposeert hebben.

Meester Pieter Baudins, Pieter Beys, Jan van den Damme ontfynghen van zekeren persoonen over Maercke Robeerts die doe in vanghenessen lach omme den zelven te helpene

XX lib. gr.

⁺ Belast van eenen persoon.

Lievin van der Pale hadde ter causen van den voorseyden Maercke ende ten zelven occusoene een rente weert

XXX sc. gr.

Pieter de Grave hadde ter occusoene van der zelver zake van svoorseyten Maerckx weghen een rente weert XX sc. gr. Ende van desen voorseyden tween es vulle bedrach.

Meester Monferant Alaerts wyf ontfync te meester Monffrants behouf van Janne van den Vyle VI croonen oft VI ryders omme dat de zelve meester Monffrant hem voorderen zoude in 't ghedynghe tusschen hem ende Pieter de Voldre.

Lievin van der Pale ontfync te Pieter Hueriblocx behouf eenen selveren croes weert ontrent XXXVI scilden van mynder

+ f^o 218 r^o

[p. 249]

vrauwen van Massemen om hare zaken te voorderne, ende dat gaf zo by rade van Lievin vander Pale die huer zeyde dat haer stade doen zoude.

Belast van eenen persoon diet aldus Mynder Vrauwen hoorde zegghen.

Meester Monfrants Alaerts zoude ghehadt hebben van der weduwen Willems Ritsers een selverin mauwe oft eenen croes van XXX sc. gr. ter causen van den ghedynghe dat zo hadde jeghen Ghyzelbrecht Ardyne.

Belast by eenen persoon.

Jacop Stommelin ende Luuc Cricke souden ghehadt hebben als yssuwers van Adriaen Pierssone vier scilde om dat zy hem helpen zouden an de ontfanghers voor yssuwen te zynen minsten coste ende mids dien hadden vele te beteren coop.

Belast by eenen oorconde.

Meester Pieter Baudins hadde van Maurissis de Visch in corruptien

XX sc. gr.

Belast van eenen persoon⁽¹⁾.

(1) De kopist onderbreekt hier plots zijn afschrift.
Hier eindigt dus het Gedeelte van het Handschrift geschreven omstreeks 1490, en beginnen de notas door eene tweede hand, tusschen 1500 en 1515, toegevoegd. Wij hebben deze aanteekeningen chronologisch gerangschikt, en aldus hunne volgorde in het Handschrift, waar zij somtijds ordeloos dooreengeworpen zijn, gewijzigd.