Dagboek van Gent van 1447 tot 1470. Deel 2

't Segghen tusschen den drie steden ende die van Dendermonde⁽¹⁾.

‘Wy Jhan, bi der gracien Gods, hertoghe van Lottryc, van Brabant, van Lymborgh ende marcgrave des celighs rycs, doen te wetene allen den ghonen die dese lettren zullen zien ofte hoeren lesen, dat, alse tebat, ghescil, discord, twist ende onpais gheweist hebben tusschen den goeden lieden van den drien goeden steden, Ghend, Brucghe, Ypre ende den ghemenen lande van Vlaendren, ende haren hulperen, in d'een side, ende den goeden lieden van der port van Denremonde ende die hem toebehooren in d'ander side, van den welken de voorseits partien an beeden siden ghekeert syn ende bleven ter ordinnanchen ende secghene van ons, also de ghescriften ende lettren van den compromisse, gheseghelt metden seghelen der drie goeder steden van Vlaendren voorseit over hem ende over 't ghemeene land van Vlaendren, an d'een side, ende metden seghelen van der port van Denremonde, eens edels mans heere Ingergiers, here van Ambaise ende van Denremonde, alse

(1) Dit stuk werd verbeterd volgens het oorspronkelijke stuk, N^r 407 van het Gentsch Stadsarchief; de groote zegel in bruin was van Jan III is nog zeer wel bewaard.

[p. 97]

here sonder middel, ende eens wel hoeghes ende moghens edels princhen heren Lodewycs, grave van Vlaendren, van Nevers, van Rethiers, ons liefs neven, singette⁽¹⁾, als here souverain an d'ander side, in hebben ende wel verclaren. Ende wy, ansiende 't groete grief ende scade die van den voorscrevene discorden commen ende spruten mochten, omme die te scuwene ende te bevelne, omme 't goed van paise ende omme de verbonde ende allianchen die tusschen ons, onsen lande van Brabant, onsen⁺ voorscreven neve den grave ende sinen lande van Vlaendren ghemaect syn, te vaster ende te stercker te blivene te eweleken daghen, ghehad goede deliberatie, voorsienichede ende ripen raed up de voorscrevene dinghen ende dat daer toe behoort, secghen ende pronuncyeren in der manieren hier naer volghende. In 't eerste, dat die van Denremonde ende die hem toebehoeren delivereren alle de ghevanghene die sy ghevanghen hebben sident dat sy hem eerst stelden tseghen de steden ende dlandt van Vlaendren vorseyd, ende secghen quite alle eede, borghtochten die zy yemen daer af ghedaen mochten hebben, ende in 't ghelike dat voerscreven es, zal men delivereren de ghevanghene in d'ander zyde. Item, zullen die van Denremonde restitucie ende keeringhe doen den coeplieden, van so wat landen sy syn, ende den goeden lieden van Vlaenderen van alder scade ende roeve die sy ofte de ghene die hare hulperen binnen Denremonde hebben gheweest, ghedaen hebben, also verre als men voer ons ende voer de voorseyden drie goede steden van Vlaendren ofte voer de ghedeputeirde daer toe in 't ware doen zal, uteghesteken brant, manslachte, mincken oft quetsinghen van lieden. Item, dat die van Denremonde drie gate, weghen ende damme, elc viertech voeten wyt, maken zullen in hare vesten van Denremonde an de Vlaender side, also het ende daer 't den goeden lieden van den voorseyden drien goeden steden van Vlaendren ofte haren ghedeputeirden goet dincken zal, soe dat mer duerre varen, keeren, gaen ende ryden

(1) Singette, kleine zegel.

+ f^o 158 v^o

[p. 98]

mach ter begherten van den voorseyden drie goeden steden, ende die weghe, gate ende damme zullen sy suffycanteleec slichten⁽¹⁾ ende wel openen ende vuldaen te hebbene binnen viertien daghen naer den dach van eden, de welke gate, weghe ende damme zy, noch hare naercommers, nemmermeer zullen moghen besluten, luucken⁽²⁾ noch wedermaken, noch die, noch andre fortretchen ofte vastenessen⁽³⁾, daer in weder maken bi ghenen engiene, het en ware bi ghemenen consente der drie steden van Vlaendren voorseyd. Item, dat die van Denremonde⁺ zullen stappans doen rumen de Scelde ende de Denre van pilen, stacboemen ende allen andren vastenessen, die sy in die rivieren ghemaect hebben, in vastenessen van harer port ende in contrarien der drie steden ende ghemeens lands van Vlaendren, ende daer af zullen zy nyet sceden voer dadtal vuldaen es. Item, dat 't achterste secghen⁽⁴⁾ dat de goede liede van der stede van Ghend ordinerden ende seiden up de port van Denremonde, alse van der draperien, al ghehauden zal bliven goet, vast ende ghestade, in allen sinen poynten ende in elc sonderlinghe, ten wille van der stede van Ghend, also verre als de lettren inhebben die daer up ghemaect zyn, beseghelt metden seghele der voorscrevene port van Denremonde.

Item, dat alle de fugitive ende ballinghen die den goeden steden van Vlaendren ofte den ghemenen lande van Vlaendren ghescaedt hebben ofte in hare scade hebben gheweist, ende oec alle de ghene die niewelinghe ute Vlaendren gheruumt syn in hulpen der port van Denremonde ende de ballinghe ende fugitive des lants van Vlaendren voorseyd, secghen wy uter poort ende lande van Denremonde ende ute onsen lande van Brabant, ende haudense ende zullen hauden van nu vorthan over onse viande ende over viande ons voorseyds lands, ghelyc

(1) Slichten, slechten, gelijk maken.

(2) Luucken, toestoppen.

(3) Vastenessen, vestingen, sterkten.

+ f^o 159 r^o

(4) 't Achterste secghen, het laatste vonnis.

[p. 99]

dat se de drie goede steden ende dlant van Vlaendren over hare vianden hauden ende hauden zullen. Item, dat meester Heinric Van den Wyngarde nemmermeer commen zal binnen der port, noch binnen den lande van Denremonde, noch binnen onsen lande van Brabant, noch binnen den lande van Vlaendren voorseyd, het en ware eendrachteleec bi consente van ons ende van den voorseyden drie goeden steden van Vlaendren. Item, omme dat die van Denremonde haren eet, dien sy daden metten drie goede steden ende lande van Vlaendren voorseyd, qualec ghehauden hebben, mids dat sy hem metden vianden⁺ 's lands hebben gheafforchiert, in contrarien den voorseyden steden ende lande van Vlaendren, dat sy haren eed verniewen zullen ende zwerren dat sy nemmermeer bi ghenen ingiene, omme enighe zake, noch omme enighs persoens wille, stellen zullen ofte contrarie werden der drie goede steden ende 's lands van Vlaendren voorseyd ende in 't ghelike zullen zy verniewen ende haren eed doen te haudene wel ende ghetrauweleec, ten eweleken daghen, de verbonden ende allianchen, die verbonden ende ghemaect syn tusschen ons ende onsen lande van Brabant, an d'een side, onsen voorseyden neve den grave, ende sinen landen van Vlaendren, an d'andre side. Ende omme de meerre versekerthede van allen den poncten die in onse secghen voorseyd ghescreven syn, ende van elken poncte sonderlinghe, zo zullen die van Denremonde delivereren ende overgheven hare ghisele in der manieren dat besproken ende gheordiniert es, dat's te wetene, ons achte ende elker van den voorscrevene drien goeden steden van Vlaendren achte, daer te blivene ende van daer niet te scedene toter tyt dat dit onse secghen in alle sine poncte ende in elc sonderlinghe vulcommen ende vuldaen wesen zal, ende dat de port van Denremonde ghelden ende betalen zal de costen ende terringhen van haren voorseyden ghiselen, die sy in hare ghiselsceep doen zullen tameleec ende redenleec; daer tseghen zal de port van Denremonde hebben ende heffen 't goet dat toe behoert haren porteren die ghisele ghekoren ende ghenomt waren ende in overho-

+ f^o 159 v^o

[p. 100]

richeden in hare ghiselsceep niet commen en syn. Ende war 't soe dat die van Denremonde ofte die hem toebehoeren, ofte hare naercommers, ofte enigh van hemlieden, in ghebreke oft in faute waren, ofte contrarie daden, ofte poegheden te doene, ofte enighe remedie sochten tseghen ons voorseyde secghen ofte⁺ tseghen enigh point van dien, so secghen wy ende pronuncyeren dien van Denremonde ende haren naercommers ende elken van hemlieden over al ghehauden te sine in ene wettelieke scult van drien dusentech ponden grooten tornois, dat's te wetene, tseghen elke van den drien goeden steden van Vlaendren voorscreven in dusentech ponden grooten tornois, also dicke ende also menichwaerven alse sy oft enigh van hemlieden in fauten, ghebreke ofte hoverhoricheden wesen zullen, dit voorscreven secghen altoes blivende in sine cracht ende virtut, in der manieren alse voerscreven es. In orkondscepen ende in kenleecheden van allen den voorseyden dinghen ende van elken sonderlinghe, hebben wy dese jeghenwoordeghe lettren doen beseghelen met onsen propren zeghelen huuthanghende. Dit was ghedaen ende ghesciet in de presentie ende jeghenwordechede onser liever ende gheminder manne ende raed Jhanne Van Wyfliet, heere van Blarsvelt, ons broeder; Gillise Van Quaetrebbe, heere van Berge; Gherard Van der Eyden, onse drussate van Brabant; Jan Van Meldert, ridderen ende Jhanne profst van Arnhem, te Herderchem up 't Kerchof, ende daer naer ghelesen ende gheseit in 't herre van Vlaendren voer Denremonde, ende daer naer binnen der port van Denremonde, voor al 't comuun van der port, dat omme dese zake vergadert was, 's donredaghs den ellefsten dach in ougstmaent, in 't jaer ons Heren doe men screef dusentech drie hondert veertich ende vive⁽¹⁾.

+ f^o 160 r^o

(1) Dus pas drie weken na den moord op Jacob van Artevelde; zie verder over die zaak het HS. 437 der Stadsbibliotheek te Brugge, Cronike van Vlaenderen, f^o 172 v^o, afgeschreven door Jacob De Meyere, Annales Flandrioe, f^o 147 r^o.